Xitoy AQShga jiddiy norozilik bildirdi va beshta kompaniyaga sanksiya kiritdi
Pekin vakili buning sababini tushuntirdi.
Xitoy Tayvanga qurol sotgani uchun AQShning beshta kompaniyasiga sanksiya kiritdi va norozilik bildirdi. Bu haqda Xitoy Tashqi ishlar vazirligi maʼlum qilgan.
"Qoʻshma Shtatlar Xitoyning Tayvan mintaqasiga qurol sotish va turli bahonalardan foydalanib, Xitoy kompaniyalari va shaxslariga bir tomonlama noqonuniy sanksiyalar qoʻllash orqali mamlakat suvereniteti va xavfsizlik manfaatlariga jiddiy zarar yetkazmoqda", - deydi TIV vakili.
Uning qayd etishicha, Vashingtonning bunday harakatlari Tayvan boʻgʻozidagi tinchlik va barqarorlikka ham tahdid soladi hamda Xitoy kompaniyalari va jismoniy shaxslarining qonuniy huquq va manfaatlariga jiddiy putur yetkazadi.
Shuningdek, Xitoy hukumati Amerikaning beshta harbiy kompaniyasiga, jumladan BAE Systems Land and Armament, Aliant Techsystems Operation, AeroVironment, ViaSat larga nisbatan sanksiyalar joriy etishga qaror qildi.
Ushbu chora-tadbirlar Xitoyda koʻchmas va boshqa turdagi mulklarni muzlatish, shuningdek, Xitoy tashkilotlari va jismoniy shaxslariga ular bilan savdo qilish, hamkorlik qilish va boshqa faoliyatni taqiqlashni oʻz ichiga oladi. Rasmiy Pekin Vashingtonni “yagona Xitoy” tamoyili, xalqaro huquq va xalqaro munosabatlarning asosiy normalarini qoʻllab-quvvatlashga, Tayvanni qurollantirishni va Pekinga qarshi bir tomonlama sanksiyalarni toʻxtatishga chaqirdi.
"Aks holda, Xitoy qatʼiy va kuchli javob qaytaradi", - deya ogohlantirdi Tashqi ishlar vazirligi.
