Jek Ma Xitoy hukumati bilan kelishmovchilik sabab misli koʻrilmagan mablagʻ yoʻqotdi
Baʼzi manbalarga koʻra shaxsan XXR raisi Si Szinpinning oʻzi Jek Mani tanqid qilgani aytiladi.
Milliarder Jek Ma tomonidan asos solingan Xitoyning Ant Group va Alibaba kompaniyalari biznesmen va Xitoy rasmiylari oʻrtasidagi ziddiyat tufayli 850 milliard dollardan koʻproq zarar koʻrgan. Bu haqda Bloomberg oʻz hisob-kitoblariga asoslanib yozmoqda.
Agentlikning eslatishicha, milliarder qariyb uch yil avval Xitoy regulyatorini tanqid qilganida "qora roʻyxat"ga tushgan. Hatto baʼzi manbalarga koʻra shaxsan XXR raisi Si Szinpinning oʻzi Jek Mani tanqid qilgani aytiladi.
Shundan soʻng, uning fintech startapi Ant Groupning IPOsi bekor qilindi va IT giganti Alibaba bir necha qismlarga boʻlib yuborildi.
Bloomberg maʼlumotlariga koʻra, Ant Group oʻz biznes modelini qayta koʻrib chiqishga majbur boʻldi, davlat banklari bilan raqobat qilishdan bosh tortdi va baʼzi iqtisodiy operatsiyalarini toʻxtatdi.
Shu sababli kompaniyaning taxminiy qiymati 315 milliard dollardan 78,5 milliard dollarga tushib ketdi.
Agentlik tahlilchilarining hisob-kitoblariga koʻra, Alibaba aksiyalari Ant Group boʻyicha tergov yakunlangan bir paytda 8 foizga oshgan va kompaniyaning qiymati hozirda taxminan 234 milliard dollarga yetgan.Ammo bu kompaniyaning 2020 yildagi eng yuqori qiymatidan 620 milliard dollarga kam.
Mart oyi oxirida The Wall Street Journal Jek Ma bir yil xorijda boʻlganidan keyin Xitoyga qaytganini yozgandi. Qayd etilishicha, tadbirkor oʻtgan yilning asosiy qismini Yaponiyada oʻtkazgan, Xitoy Yangi yilini esa Gonkongda nishonlagan. Bundan tashqari, u yaqinda Singapur va Avstraliyaga sayohat qilgan.