Mushukni tiriklay yoqqanlarga qoʻllangan jarima bekor qilindi
Mahalliy organlar holatni yetarlicha malakalay olmagani sababli bu uchovlon jarima bilan qutulib qolgandi.
Fargʻonada mushukni tirik holatda yoqib yuborgan shaxslarga qoʻllanilgan BHMning 3 baravari miqdoridagi jarima jazosi Quvasoy shahar prokurorining protesti bilan bekor qilingan.
Bir necha kun oldin 3 fuqaro mushukni qafasga qamab, uni yonilgʻi sepib, tiriklay yoqishgan va oʻlishini tomosha qilib turishgan. Kamiga bu holatni videoga olib, internetga joylagan.
Ammo mahalliy organlar holatni yetarlicha malakalay olmagani sababli bu uchovlon jarima bilan qutulib qolgandi.
Hozir huquqbuzarlarga nisbatan Maʼmuriy javobgarlik toʻgʻrisidagi kodeksining 111-moddasi 2-qismi (Hayvonlarga nisbatan shafqatsiz munosabatda boʻlish) va 189-1-moddasi (Tazyiqni, zoʻravonlikni yoki shafqatsizlikni targʻib qiluvchi mahsulotni tayyorlash, olib kirish, tarqatish, reklama qilish, namoyish etish) bilan rasmiylashtirilgan maʼmuriy bayonnoma mazmunan koʻrib chiqishlik uchun sudga yuborilgan.