Toshkentdagi sexda portlash boʻldi
Portlash sexning bir qavatli bostirmasida havo-gaz aralashmasining chaqnashidan yuzaga kelgan.
Bugun, 14 iyun kuni soat 09:50 larda Toshkent shahar Chilonzor tumani "Astrobod" koʻchasida joylashgan mis quvurlari ishlab chiqarish sexida portlash yuz bergan.
Rasmiy maʼlumotga koʻra, portlash sexning bir qavatli bostirmasida havo-gaz aralashmasining chaqnashidan yuzaga kelgan. Bu hozircha dastlabki maʼlumot xolos.
Zudlik bilan voqea joyiga FVV rahbariyati boshchiligida yongʻin-qutqaruv ekipajlari, shuningdek, Prokuratura, IIV, MG, SSB, Hududgaz va boshqa tegishli tashkilotlar xodimlari yetib borgan. Ayni vaqtda hodisa oqibatlari bartaraf etilmoqda.
Dastlabki maʼlumotlarga koʻra, chaqnash oqibatida 6 fuqaro turli darajada tan jarohati olib, Respublika shoshilinch tibbiy yordam ilmiy markaziga yotqizilgan.