Bosh prokuratura boshqarma katta prokurori hamda tuman tergovchisi firibgarlik va poraxoʻrlikda ayblanmoqda
Bosh prokuratura hozirda mazkur xodimlarga nisbatan jinoyat ishi qoʻzgʻatilgani va tergov harakatlari olib borilayotganini maʼlum qildi.
Bosh prokuratura boshqarma katta prokurori E.A. hamda Uchtepa tumani prokuraturasi tergovchisi A.D.larning jinoiy qilmishlari fosh etilib, ularga nisbatan joriy yil 6 may kuni Jinoyat kodeksining 168 (Firibgarlik) va 28, 211 (Pora berish) moddalar bilan jinoyat ishi qoʻzgʻatildi.
Jinoyat ishi boʻyicha gumonlanuvchilar protsessual tartibda ushlandi. Hozirda tergov harakatlari olib borilmoqda.
"Tergovga aralashish va toʻsqinlik qilish holatlarining oldini olish maqsadida boshqa tafsilotlar oshkor qilinmaydi", deyiladi xabarda.
Bosh prokuratura esa prokuratura organlarida korrupsiyaga qarshi kurashish, tizimni nopok xodimlaridan tozalash borasida barcha zarur choralar koʻrilayotganini maʼlum qildi.