Meksika orqali AQShga noqonuniy oʻtish toʻxtatiladi

11 may kuni AQSh rasmiylari Meksika bilan chegarani noqonuniy kesib oʻtgan koʻplab migrantlarning boshpana soʻralgan murojaatlari rad etilishini koʻzda tutuvchi yangi qarorni eʼlon qilishadi. Shu bilan birga, ayni shu kuni butun AQSh chegaralari boʻylab COVID-19 sababli joriy etilgan cheklovlar bekor qilinadi, degan AQSh Ichki xavfsizlik vaziri Alexandro Mayorkas.

Yangi qarorga koʻra, boshqa davlatlar orqali ulardan boshpana soʻramasdan yoki boshqa noqonuniy yoʻllar bilan AQShga kirib kelgan migrantlar Qoʻshma Shtatlardan boshpana soʻrash huquqiga ega boʻlishmaydi.

Bunday qadam AQSh prezidenti Jo Baydenning noqonuniy immigratsiyaga qarshi kurashish rejasining bir qismi hisoblanadi. Chunki keyingi haftada COVID-19 cheklovlari bekor qilinadi va bu noqonuniy immigratsiyaning keskin oʻsishiga sabab boʻlishi kutilmoqda.

Amerika maʼmuriyati migrantlarni AQShga kirish uchun qonuniy yoʻllardan foydalanishga chaqiradi. Aks holda ular yangi va tezlashtirilgan deportatsiya jarayoniga duch kelishlari mumkin, deya bayonot bergan Mayorkas Texas shtatining Braunsvill shahrida boʻlib oʻtgan matbuot anjumanida.

Mayorkasning soʻzlariga koʻra, Meksika hukumati mamlakat janubidagi xavfsizlikni kuchaytiradi. Joriy haftada AQSh va Meksika oʻrtasida tuzilgan kelishuv shu kabi choralarni koʻzda tutadi. Lekin Meksika Mudofaa vazirligi bu borada biror maʼlumotga ega emasligini bildirdi.

Oxirgi haftada AQSh va MEksika chegarasida migrantlarni qamoqqa olish holatlari koʻpaydi. Mayorkas buni chegarani kesib oʻtayotgan venesuelaliklar koʻpaygani bilan izohladi.

Shuningdek, keyingi haftada Bayden maʼmuriyati “CBP One” mobil ilovasidan foydalanish imkoniyatini kengaytiradi. Mazkur ilova migrantlarga kirish nuqtasiga borish uchun oldindan uchrashuv belgilash imkoniyatini beradi.

AQSh Bojxona-chegara xizmatining maʼlumotlariga koʻra, 12 maydan boshlab har kuni 1000 migrant uchrashuv belgilay olishi mumkin.