Mahalliy byudjetdan mablagʻ ajratilgani haqidagi qaror nega yashirib qoʻyildi?

2 oycha Toshkent shahar hokimi vazifasini bajargan Baxtiyor Rahmonov bir qator qarorlarni E-qaror tizimida asossiz ravishda yashirib qoʻygan boʻlishi mumkin. 5,2 mlrd. miqdoridagi byudjet puli haqidagi qaror shulardan biri.
Jamiyat
13-aprel 2023 yil
Mahalliy byudjetdan mablagʻ ajratilgani haqidagi qaror nega yashirib qoʻyildi?

Xususan, 2023 yil 15 mart kuni imzolangan 196-14-0-Q/23-sonli qarorda shahar hokimligi maʼmuriy binosini saqlash, 2023 yil uchun kommunal, internet va boshqa xarajatlarni qoplash maqsadida mahalliy byudjet zaxira mablagʻlari hisobidan 5,2 mlrd. soʻm pul ajratilgan.

Ammo bu qaror “shaxsga doir maʼlumotlar, vasiylik va homiylik yoki amaldagi qonunchilikka muvofiq boshqa turdagi foydalanishi cheklangan axborot mavjudligi tufayli” degan vaj bilan tizimda yashirib qoʻyilgan.

Lekin qaror davlat xaridlari portalidagi shartnomalarga ilova qilingan. Boshqa bir holatda esa 15 martda chiqqan bu qaror 14 fevraldagi, yaʼni roppa-rosa 1 oy avval tuzilgan shartnomaga asos qilib koʻrsatilgan.

Xoʻsh, nega mahalliy byudjet zaxira mablagʻlari hisobidan 5,2 mlrd. soʻm pul ajratilgani haqidagi qaror yashirib qoʻyildi? Bu qarorda qanday shaxsga doir maʼlumotlar, vasiylik va homiylik yoki amaldagi qonunchilikka muvofiq boshqa turdagi foydalanish cheklanishi kerak boʻlgan qanday axborot mavjud? Shu savolga javob yoʻq hozircha.

Eslatib oʻtamiz: Baxtiyor Rahmonov Toshkentga 2023 yil yanvarda vaqtincha hokim boʻlgan va mart oyida boʻshatilib, eski lavozimiga qayta tayinlangan. Uning oʻrniga Shavkat Umrzoqov vaqtincha hokim etib tayinlangan.
 

© 2023 Platina.uz. Barcha huquqlar himoyalangan. «Platina.uz» saytida joylangan ma'lumotlar muallifning shaxsiy fikri. Saytda joylangan har qanday materiallardan yozma ruxsatsiz foydalanish ta'qiqlanadi.
O‘zbekiston Respublikasi Prezidenti Administratsiyasi huzuridagi Axborot va ommaviy kommunikatsiyalar agentligi tomonidan 02.12.2022 sanasida №051412 sonli guvohnoma bilan OAV sifatida roʻyxatga olingan.
Platina.uz saytida reklama joylashtirish masalasida +998 97 022 01 10 telefon raqamiga (Telegram: Platina PR) murojaat qiling. Tahririyat bilan aloqa: info@platina.uz
18+