12-aprel, 2023

Alisher Usmonovga aloqador “Ohangaronsement” AQSh sanksiyasiga uchradi

Alisher Usmonovning USM xolding kompaniyasiga aloqador Akkermann Cement CA va u egalik qiladigan “Ohangaronsement” AJ AQSh hukumati sanksiyasiga uchradi. Bu haqda AQSh moliya vazirligi maʼlum qildi.

AQSh moliya vazirligining Chet el aktivlarini nazorat qilish boshqarmasi (OFAC) yangi sanksiyalar roʻyxatiga kiritilgan Akkermann Cement CA bilan operatsiyalarni 11 iyulgacha tugatish talabini qoʻydi.

AQSh hukumatining yangi sanksiyalar paketidan rossiyalik milliarder Alisher Usmonovga qarashli USM holdingi hamda uning tarkibidagi "Metalloinvest", "Megafon" kompaniyalariga qarshi cheklovlar ham joy olgan.

2021 yil may oyida Kiprning Lamanka Enterprises kompaniyasi "Ohangaronsement" zavodi ustav kapitalidagi 84,197 foiz ulushni sotib olgan, bitim summasi 557,6 milliard soʻmga baholangan edi. 2022 yil yanvar oyida Britaniya Virjiniya orollarining Giacinttar va Lamanka Enterprises kompaniyalari "Ohangaronsement"dagi ulushlarini 1,88 trillion soʻmga sotgan. Keyinchalik xaridor Akkermann Cement CA ekani maʼlum boʻlgan.