Yangi yilda koʻriladigan filmlar oʻntaligi

Baʼzan inson oʻzi yashayotgan muhitni tasvirlar orqali koʻrishni istaydi. Yaʼni uni badiiy, vizual tarzda his qilishni xohlaydi. Bunda koʻp hollarda badiiy filmlar qoʻl keladi. Aytaylik, yangi yil yaqinlashgani sayin qishni ifodalovchi, oppoq qorga burkangan sahnali filmlarga talab ortadi. Shu talabdan kelib chiqqan holda Platina.uz yangi yilda koʻriladigan filmlar oʻntaligi haqida maʼlumotlarni taqdim etadi.

1. “Uyda yolgʻiz”, 1990 yil

AQSh kinoijodkorlari tomonidan suratga olingan oilaviy komediya. Film eng kassabop filmlar roʻyxatida "barcha davrlarning eng koʻp daromad keltirgan komediya filmi" sifatida eʼtirof etilib, 2011 yilgacha yetakchi oʻrinda boʻlgan. Filmda jajji aktyor Makoley Kalkin tasodifan Yangi yilda yolgʻiz qolib ketgan 8 yoshli Kevin Makkalister qahramoni rolida gavdalangan. 1991 yilda bosh rol ijrochisi "Oltin globus"ning "Eng yaxshi film" va "Eng yaxshi aktyor" nominatsiyalarida gʻolib boʻldi. Bastakor Jon Uilyams "Eng yaxshi film musiqasi" uchun Oskar mukofotining ikkita nominatsiyasini oldi. Makkalisterlar xonadoni hayotda ham mavjud boʻlib, uning manzili – Illinoys shtatining Uinnetka shahrida, Linkoln prospektidagi 671-uy. Filmning muvaffaqiyati toʻgʻridan-toʻgʻri davomi – “Uyda yolgʻiz 2: Nyu-Yorkdagi sarguzashtlar” filmi 1992 yilda ekranga chiqqan. Ikkala film 2003 yilda oʻzbek tiliga oʻgirilgan.

2. “Taqdir hazili yoxud qushdek yengil boʻling”, 1975 yil

Rejissyor Eldar Ryazanov tomonidan taqdim etilgan film 1976 yil 1 yanvarda ekran yuzini koʻrgan. Kamtarona byudjetli, televideniye uchun tayyorlangan bu romantik komediya sobiq sovet ittifoqdagi eng mashhur filmlardan biriga aylandi va millionlab muxlislar uchun Yangi yil ramzi boʻlib qoldi. U har yil soʻngida teleekranlarda namoyish etiladi. Film voqealarida har yangi yil arafasida doʻstlari bilan hammomda hordiq chiqarishga odatlangan Yevgeniy bu safar gʻirt mast holda doʻstlarining hazili tufayli Leningradga uchadigan samolyotga chiqib qoladi. Taksida oʻz uyining manziliga yetib kelib, kaliti bilan birovning uyiga kirganini ham bilmaydi.

3. “Grinch – Yangi yil oʻgʻrisi”, 2000 yil

2000 yilda ekranlarga chiqarilgan fantastik komediya film. Film gʻoyasi Teodor Seuss qalamiga mansub shu nomdagi kitobga asoslangan. Filmda bosh rollarni Jim Kerri, Taylor Momsen, Jeffrey Tambor, Kristin Baranski, Bill Irvin va Molli Shennon ijro etishgan. Filmdagi voqealar uzoq kutilgan Rojdestvo bayrami va mahalliy aholi orasida bu ajoyib bayramni yomon koʻradigan Grinch ismli mavjudot haqida hikoya qiladi. U hammadan uzoqda yashaydi va hech kim bilan muloqot qilmaydi, chunki bolaligidan beri Grinch tashqi koʻrinishi tufayli boshqa bolalar tomonidan doimo masxara qilingan. Film dastlab tanqidchilar tomonidan turli baholarga ega boʻlgan, garchi Kerrining ijrosi va boʻyanishi maqtovga sazovor boʻlsa-da, ular buni tanqid qilishgan. Film Amerika Qoʻshma Shtatlarida 1-raqamli film sifatida toʻrt hafta oʻtkazdi va butun dunyo boʻylab 345,8 million dollar yigʻib, 2000 yilda eng yuqori daromad keltirgan oltinchi filmga aylandi.

4. “Charli va shokolad fabrikasi”, 2005 yil

2005 yilda Tim Burton tomonidan ishlab chiqarilgan badiiy film britaniyalik yozuvchi Roald Dalning 1964 yilda chop etilgan xuddi shu nomdagi kitobiga moslashtirilgan. Voqealar Charli va uning qashshoqlikdan jabr koʻrayotgan oilasi atrofida aylanadi. Bola ota-onasi va buvisi bilan oddiy uyda yashaydi. Shuningdek, voqealar davomida Charli Baketning eksantrik shokoladchi Villi Vonkaning shokolad fabrikasidagi sarguzashtlari tasvirlangan. Rollarda Jonni Depp, Freddi Xaymor, Devid Kelli, Dip Roy, Helena Bonem Karter, Adam Godli, Anna Sofiya Robb ishtirok etgan.

5. “Omadli jentlmenlar”, 1971 yil

“Omadli jentlmenlar” kriminal komediya filmi 1971 yil Aleksandr Seriy tomonidan suratga olingan boʻlib, unga ssenariy Georgiy Daneliya bilan hamkorlikda yozilgan. Film katta ekranlarga 1971 yil 13 dekabrda chiqarilib, tezda mashhurlikka erishdi. 1972 yildan televideniye orqali uzatilishni boshlaganida, bir yil ichida 65 milliondan ortiq marta koʻrildi. Bu natija oʻsha davr uchun mutlaq rekord boʻlib, oʻzining dolzarbligini uzoq vaqt saqlab qoldi. Film ushbu fenomenal muvaffaqiyatga oʻzidagi iboralar, iqtibos va suhbatlar sabab erisha oldi. Filmda rollarni Yevgeniy Leonov, Georgiy Vitsin, Saveliy Kramarov, Radner Muratov, Erast Garin va boshqalar ijro etgan.

Filmning suratga olish ishlari 1970 yil dekabrdan to 1971 yil apreligacha davom etgan va ancha mashaqqatli kechgan. Filmning ayrim lavhalari Samarqandda olingan. 2006 yil filmning 35 yilligiga Qozogʻistonning Taraz shahrida bosh qahramonlar uchun haykal oʻrnatildi. 2012 yilda esa film “Jentlmenlar, omad!” nomi ostida qayta ishlangan. Undagi barcha voqealar deyarli bir xil boʻlib, faqatgina davr oʻzgarishi: 1970 yillarning 2010 yillarga koʻchishi kuzatiladi.

Muzlik davri 2002 yilda eng koʻp daromad keltirgan multfilmlar roʻyxatida 8-oʻrinni egallaydi. Ushbu animatsion film dunyo boʻylab mislsiz shuhrat qozongan. Film ssenariysi Maykl J.Uilsonning hikoyasi asosida Kris Vayj va Karlos Saldana hamkorligida yozib chiqilgan. Ushbu multfilm 2002 yil 15 martda sotuvga chiqarilgan. "Muzlik davri" omma eʼtiboriga havola qilingach, tomoshabinlar tomonidan juda ijobiy kutib olingan.

Bu film "Eng yaxshi animatsion film" nominatsiyasi boʻyicha Oskarga loyiq deb topildi. Filmning birinchi qismidan kartina ijodkorlari 383 million dollar foyda koʻrishgan. Film katta sahnalarga chiqarilgan haftaning oʻzida 43.3 million dollar mablagʻ yiqqan.

7. “Elf”, 2003 yil

Elf – 2003 yilda rejissyor Jon Favro va ssenariy muallifi Devid Berenbaum tomonidan sahnalashtirilgan komediya filmi. Film Amerika Qoʻshma Shtatlarida 2003 yil 7 noyabrda chiqarildi. Film Baddi ismli elf haqida hikoya qiladi, u Shimoliy qutbda elflar tomonidan tarbiyalangan. U boshqa elflarga oʻxshamasligi ayon boʻlgach, haqiqiy otasini topish uchun Nyu-Yorkka boradi. Baddi bolalarcha soddalik va begʻuborlikka toʻla. U katta shahar hayotiga moslashishga harakat qiladi, otasi esa Rojdestvo moʻjizalariga ishonmaydi.

8. "Santa Klaus”, 1994 yil

Tim Allen bosh qahramon sifatida koʻrinish bergan komediyada Shimoliy qutbga borib qolgan oddiy oʻyinchoq sotuvchisi Santa Klausning oʻrnini egallashiga toʻgʻri keladi. Qahramon nafaqat yangi obrazga koʻnikishi, balki bayramni ham saqlab qolishi kerak boʻladi. Uchta qismdan iborat film bayram shukuhini baxsh etishiga shubha yoʻq.

9. “Qor malikasi”, 1966 yil

"Qor malikasi" – animatsiya elementlari boʻlgan sovet toʻliq metrajli ertak filmi boʻlib, 1966 yilda rejissyor Gennadiy Kazanskiy tomonidan Xans Kristian Andersenning shu nomli ertagi asosida suratga olingan. Film Yevgeniy Shvars ssenariysi hamda oʻzining ertak asari asosida sahnalashtirilgan. Filmning premerasi 1967 yil 6 noyabrda boʻlib oʻtgan. Qor malikasiga afsonaviy aktrisa Mariya Babanova ovoz bergan.

10. "Sohibjamol va mahluq", 1991 yil

1991 yilda Uolt Disney studiyasi “Sohibjamol va maxluq” musiqiy fantastik multfilmini chiqardi. Film Disneyning 30-animatsion badiiy filmi hisoblanadi. U oʻzining romantik hikoyalari, animatsiyasi (ayniqsa, bal sahnasi), personajlar va musiqasi eʼtiroflarga sazovor boʻldi. Film “Oltin globus” mukofotini qoʻlga kiritdi va bu mukofotni qoʻlga kiritgan birinchi animatsion film boʻldi.

Odinaxon Dehqonova tayyorladi.