Andijonlik nonvoyning Toshkentdagi hayoti (fotohikoya)

Xalqimiz nonni eʼzozlaydigan xalq. Bizga har tong va har vaqtda issiq non yetkazib beruvchi nonvoyning hayot tarzi qanday? Non bizning qoʻlimizga tayyor holga kelguncha qanday bosqichlardan oʻtadi?

Platina.uz nonvoy hayotidan fotohikoya tayyorladi.

Nonvoy asli Andijondan boʻlgan Ulugʻbek aka. Ulugʻbek akaning aytishicha 5 yildan beri nonvoychilik qiladi. Ishlash maqsadida Toshkentga kelib keyinchalik shu hunarni oʻrgangan. Hozir Toshkentning eski mahallalaridan biri Qazi mahallada nonvoyxonasi boʻlgan uyni ijaraga olgan. Oilasi bilan mana shu mahalla aholisiga hamda yaqin atrofdagi doʻkonlarga non yetkazib beradi. Nonvoyxonada kuniga oʻrtacha 500 dona non yopiladi. Nonga yana buyurtma berilishiga qarab bu miqdor koʻpayishi mumkin. Asosan yon atrofdagi 5-6 doʻkonga va choyxona va restoranlarga non yetkazib beradi.

Nonvoy akaning aka-ukalari ham mana shu hunar bilan non shahrida roʻzgʻor tebratadi. Katta farzandlari Mavluda maktabga Toshkentda borgan. Hozir 2-sinf oʻquvchisi boʻlgan qizaloq otasining kasbiga qiziqadi va unga yordamlashadi.

Nonvoyning hayoti hech kimga sir emas. U odamlar dasturxoniga issiq non yetkazib berish uchun tong sahardan tandir qizdiradi. “ Hozir mehnatimiz ancha yengillashib qolgan”- deydi nonvoyxonadagi zahmatini yengilashtirayotgan zamonaviy dastgohlarni koʻrsatib Ulugʻbek aka.

“Masalliqlarni solasiz, Xamirni tehnika qiladi. Zuvala qilib berasiz, tehnika rostlab beradi. Oʻtin oʻrniga Toshkentda gaz ishlatamiz. Oʻtinni viloyatda yoqamiz” –deydi gapini davom ettirib.

Nonvoyxonada asosan ikki xil patir va yopgan non hamda buyurtmaga koʻra goʻshtli non yopiladi.

Tong sahardan kech qorongʻugacha nonvoyxona ishlaydi. “Kimdir kech qolsa mahallada telefon raqamim bor, hamma bemalol qoʻngʻiroq qiladi. Mahallaga begona boʻlsak ham singib ketganmiz- deydi sevinib nonvoy.

Fazilat Soib