Yaponiyada vazirlar yoppasiga ishdan boʻshayapti
Yapon matbuotida yoritilgan poraxoʻrlik mojarolari fonida hukumat reytingi keskin pasaydi.
Yaponiyada siyosiy mojaro tufayli birdaniga bir nechta vazir isteʼfoga chiqdi.
Bosh vazir Fumio Kisida payshanba kuni hukmron Liberal-demokratik partiyaning eng yirik fraksiyasidagi noqonuniy mablagʻ yigʻish va poraxoʻrlik mojarosi tufayli vazirlar mahkamasining toʻrt aʼzosini almashtirishga qaror qildi, deb xabar bermoqda Kyodo agentligi.
Ishdan ketganlar qatoridagi hukumat bosh kotibi Xirokazu Matsuno marhum sobiq bosh vazir Sindzo Abe fraksiyasiga mansub.
Matsunodan tashqari Iqtisodiyot, savdo va sanoat vaziri Yasutoshi Nishimura, milliy ishlar va kommunikatsiyalar vaziri Junji Suzuki va qishloq oʻrmon va baliqchilik vaziri Ichiro Miyashita ham oʻz lavozimlaridan ayrildi.
Bundan tashqari Yaponiya Liberal-demokratik partiyasi siyosiy kengashi rahbari va sobiq iqtisodiyot vaziri Koichi Xagiuda, Parlament bilan hamkorlik boʻyicha qoʻmita raisi va sobiq bosh vazir Sindzo Abe fraksiyasi bosh kotibi Suyesi Takagi ham isteʼfoga chiqdi.
Maʼlumotlarga koʻra, yapon matbuotida yoritilgan mablagʻlarni tegishli hujjatlarsiz ishlatish va korrupsiya bilan bogʻliq mojarolar hukumat reytingining keskin tushib ketishini taʼminlagan va isteʼfolarga olib kelgan.