Turkiya barqaror turizmda oʻrnak koʻrsatayotgani eʼtirof etildi

Global Barqaror Turizm Kengashi (GSTC) bilan hukumat darajasidagi shartnomani imzolagan dunyodagi birinchi davlat boʻlgan Turkiya, SOP 28 (28-UNSSS Tomonlar Konferensiyasi)dagi Turkiya pavilonida turizmga yoʻnaltirilgan davra suhbatini tashkil etdi.

Birlashgan Millatlar Tashkilotining Iqlim oʻzgarishi boʻyicha konferensiyasidagi Turkiya muzokarasida, mamlakatning yetakchi Milliy Barqaror Turizm dasturiga eʼtibor qaratildi. Kapadokiya universiteti rektori Prof. Dr. Hasan Ali Karasar tomonidan oʻtkazilgan suhbatda Turkiya Turizmni targʻib etish va rivojlantirish agentligi (TGA) boshqaruv aʼzosi Kaan Kashif Kavaloʻgʻli, TGA Bosh direktor oʻrinbosari Dr. Elif Balji Fisunogʻlu, GSTC boshqaruv kengashi raisi oʻrinbosari Ramkumar (Ram) va Turkiya mehmonxonachilar federatsiyasi (Türofed) prezidenti Erkan Yagʻji ishtirok etdi.

Muzokara davomida, Ramkumar, “Barqarorlik juda batafsil mavzu va biz koʻplab mamlakatlar turizm sohasida oʻzlarining yoʻl xaritasi asoslarini hali ham muhokama qilayotganini koʻrmoqdamiz. Boshqa tomondan, Turkiya allaqachon qonuniy asosini tugatgan va hozirda barcha turar joy obʼektlari uchun majburiy boʻlgan dasturini ishga tushirdi. Dastur yuzlab sertifikatlangan va tasdiqlangan mehmonxonalar bilan sezilarli natijalarni koʻrsata boshladi va shu tariqa Turkiya hozirda turizm sohasida barqarorlikning global namunasi boʻlib kelmoqda” dedi.

TGA bosh direktori oʻrinbosari Dr. Elif Balji Fisunogʻlu Turkiya dasturining qanday tuzilgani va amalga oshirilganini tushuntirdi. Dr. Fisunogʻlu, “Barqarorlik yondashuvimiz asoslari Madaniyat va Turizm Vazirligining “Yashil Yulduz” dasturini boshlagan 2008 yilga borib taqaladi. 2021 yilda Turkiya Parij kelishuvini imzolaganidan soʻng taraqqiyotimiz jadallashdi va 2022 yilda GSTC bilan hamkorlik shartnomasini imzoladik. 2023 yil soʻngiga yaqinlashar ekanmiz, Turkiyada 1 milliondan ortiq mehmonxona yotoqlarining sertifikatlangan va tasdiqlanganini gʻurur bilan aytishimiz mumkin” deya fikr bildirdi.

Turkiya Milliy Barqaror Turizm Dasturi toʻrtta asosiy ustuvorlikka ega: barqaror boshqaruv, ekologik barqarorlik, madaniy barqarorlik va ijtimoiy-iqtisodiy barqarorlik. Bu doirada Turkiya 19 ta Madaniy, 2 ta aralash YuNESKO Jahon merosi, 82 ta YuNESKOning taxminiy roʻyxatidagi madaniy va tabiiy meros obʼektlari, 8 ta YuNESKO ijodkor shaharlari va 25 ta nomoddiy madaniy meros obʼektlari bilan dunyoda 2-oʻrinni egalladi. Turkiyada, shuningdek, Michelin GUIDEda barqarorlikka eʼtibor qaratuvchi yashil yulduzli 5 ta restoran mavjud boʻlib, bu turk gastronomiya ekotizimining ham barqaror yondashuvlardan xabardor ekanligini koʻrsatadi.

Turkiya mehmonxonachilar federatsiyasi prezidenti Erkan Yagʻji, dasturning nomoddiy foydalari bilan bir qatorda Turkiyadagi mehmonxonalar ham sertifikat olishining iqtisodiy foydasini koʻra boshlaganini maʼlum qildi. Yagʻji, “Barqaror turizmga aniq talab bor va sertifikatlangan mehmonxonalarimiz sayohatchilarni baholash roʻyxatida yuqori oʻrinlarga koʻtarilayotganiga guvoh boʻlmoqdamiz” dedi.

TGA dasturi hamkori Kapadokiya universiteti rektori Prof. Dr. Hasan Ali Karasarning aytishicha, dastur turizm obʼektlarining standartlarini yanada oshiradi va barqaror va masʼuliyatli turizm amaliyotlarini targʻib qilish, shuningdek, tabiiy va madaniy meros resurslarini himoya qilish va ijtimoiy-iqtisodiy rivojlanishni qoʻllab-quvvatlash orqali turizm faoliyatining barqarorligini taʼminlashga qaratilgan.