Shavkat Mirziyoyev Markaziy Osiyodagi jiddiy ekologik muammolardan ogohlantirdi
Tuproq yemirilishi 30 milliondan ziyod aholi turmush tarziga salbiy taʼsir koʻrsatmoqda.
Shavkat Mirziyoyev BMTning Iqlim oʻzgarishi boʻyicha konferensiyasida Markaziy Osiyoda iqlim oʻzgarishining keskin oqibatlari haqida gapirdi. Prezidentga koʻra, soʻnggi yillarda favqulodda issiq kunlar soni 2 marta ortdi, muzliklar maydonining uchdan bir qismi erib yoʻqolgan.
Mintaqada hududida tuproq yemirilishi jarayonlari 30 milliondan ziyod aholi turmush tarziga salbiy taʼsir koʻrsatmoqda. Kuchli chang va qum boʻronlari odatiy holga aylanib bormoqda.
Bundan tashqari ichimlik suvi taqchilligi, havo ifloslanishi, bio xilma-xillik yoʻqolishi, qishloq xoʻjaligida hosildorlikning keskin pasayishi kabi muammolar tobora avj olmoqda.
“Muxtasar qilib aytganda, bu global xavflar keng mintaqamizda oʻzining xatarli nuqtasiga yetib kelmoqda”, - deya taʼkidlagan Mirziyoyev.
Toshkentdagi “Yashil universitet” negizida tashkil etilayotgan “Iqlim ilmiy forumi”da dunyoning yetakchi olimlari va ekspertlarini ishtirok etishga chaqirdi.
Shuningdek, Birlashgan Millatlar Tashkiloti bilan 2024 yili Oʻzbekistonda "Iqlim migratsiyasi" mavzusida konferensiya oʻtkazish rejalashtirilayotgani maʼlum qilindi.
Prezident Xalqaro mehnat tashkiloti bilan hamkorlikda “Yashil bandlik” dasturi”ni ishlab chiqish, iqlim oʻzgarishining bandlikka taʼsirini Modellashtirish markazini tashkil etishni taklif qildi.