Jarima ballari qachondan ishga tushishi hamon nomaʼlum
Oradan qariyb bir yil oʻtgan boʻlishiga qaramay, bu tizim hamon ortga surib kelinmoqda.
Prezident qaroriga koʻra, 1 dekabrdan haydovchilar qoidabuzarligi uchun jarima ballarni hisoblash boshlanishi kerak edi. IIV Yoʻl harakati xavfsizligi xizmati ushbu tizim 1 dekabrdan test rejimida ishga tushganini aytgandi.
Ammo oradan qariyb bir yil oʻtgan boʻlishiga qaramay, bu tizim hamon ortga surib kelinmoqda. Bugun Oliy majlis senati yalpi majlisida yoʻl harakati qoidalari haqidagi qonunning yangi tahriri muhokama qilindi va Ichki ishlar vazirligi jarima ballari haqida maʼlumot berdi.
Aytilishicha, jarima ballari boʻyicha qonun loyihasi tayyorlangan. Unda jarima ballarini toʻplagan haydovchilarga nisbatan maʼmuriy jazo, shuningdek, ballar umumiy soni 12 tadan oshib ketsa, haydovchilik guvohnomasidan 3 yilgacha mahrum qilish jazolari qoʻllanilishi nazarda tutilgan.
25 oktabr kuni qonun loyihasi koʻrib chiqishlik va birgalikda qayta ishlash uchun Prezident administratsiyasiga kiritildi.