1 yanvardan Shahrisabz aeroportida parvozlar boshlanadi
Shavkat Mirziyoyev Qashqadaryoda yigʻilish oʻtkazmoqda.
Qarshi shahrida Prezident Shavkat Mirziyoyev raisligida Qashqadaryo viloyatini ijtimoiy-iqtisodiy rivojlantirish masalalari yuzasidan yigʻilish boʻlib oʻtmoqda.
Yigʻilishda Shahrisabz aeroportida fuqaro aviatsiyasi yoʻlga qoʻyilishi taʼkidlandi.
1 yanvardan boshlab Shahrisabz aeroportiga yangi ATR samolyoti parvozlari yoʻlga qoʻyilib, Samarqand, Buxoro, Xorazm va vodiy viloyatlariga mahalliy reyslar koʻpaytiriladi.
Toshkent-Qarshi yoʻnalishida aviareyslar haftasiga 2 martadan 7 martaga oshiriladi.
Natijada, aviachiptalar narxi 2 barobar arzonlashadi, xorijiy va mahalliy sayyohlar oqimi esa 3 barobar koʻpayadi.
Mutasaddilarga “Taxtaqoracha” dovonidan oʻtish talablarini yengillashtirish topshirildi.
Kelgusi yilda “Taxtaqoracha” dovonida yangi tonnel va yoʻl qurish loyihasi boshlanadi. Xitoylik investorlar bilan birga Samarqand bilan Shahrisabzni bogʻlovchi 30 kilometr yoʻlni taʼmirlash ishlari boshlanadi.
Shuningdek, “Gʻuzor-Buxoro-Nukus-Beyneu” yoʻlining Qashqadaryodan oʻtgan 100 kilometr qismini taʼmirlashga 122,5 million dollar jalb qilinadi.
Umuman, kelgusi yilda xorijiy sayyohlarni 500 mingtaga yetkazish vazifasi qoʻyildi, deyiladi xabarda.