Gʻazodagi urushda qancha bola oʻlgani maʼlum qilindi
Save the Children tashkilotining Falastindagi direktori Jeyson Li janglarni zudlik bilan toʻxtatishga chaqirdi.
Soʻnggi 17 kun ichida Gʻazo sektorida kamida ikki ming nafar voyaga yetmagan bola halok boʻldi. Buni Save the Children xalqaro xayriya tashkiloti maʼlumotlari tasdiqlaydi.
Tashkilot bayonotida aytilishicha, “doimiy havo hujumlari Gʻazo sektoridagi minglab binolarni tutun chiqayotgan vayronalar uyumiga aylantirmoqda”. Save the Children tashkilotining Falastindagi direktori Jeyson Li janglarni zudlik bilan toʻxtatishga chaqirdi.
U mojaro tomonlari bolalarni himoya qilishi kerakligini taʼkidladi: “Bolalar hayotini himoya qilishning yagona yoʻli bu zoʻravonlikni toʻxtatishdir”.
Avvalroq Birlashgan Millatlar Tashkilotining (BMT) besh agentligi Gʻazo sektoridagi vaziyat halokatli ekanini aytgan.
Isroilning sobiq mudofaa vaziri va mamlakat favqulodda hukumatining amaldagi aʼzosi Benni Gansga koʻra, Gʻazodagi urush oylar mobaynida davom etishi mumkin.