Toshkentda metro poyezdi yana buzilib qoldi
Hozirgi vaqtda poyezdlar belgilangan jadvalga asosan harakatlanmoqda.
Bugun, 23 oktabr kuni Toshkent metrosida yana nosozlik kuzatildi.
"Soat 09:46 lar atrofida Shahriston metro bekatining aylanma yoʻlidan harakatga chiqishi lozim boʻlgan 64-sonli harakat tarkibining havo kompressorida texnik nosozlik holati aniqlangan.
Holat yuzasidan tezkor koʻrilgan chora tadbirlar natijasida ushbu harakat tarkibi soat 10:17 da harakatlana boshlagan. Bu esa, yoʻnalishda belgilangan vaqt intervallari uzayishiga olib kelgan" deyiladi "Toshkent metropoliteni" DUK xabarida.
Hozirgi vaqtda poyezdlar belgilangan jadvalga asosan harakatlanmoqda.
Eslatib oʻtamiz, bu metro nosozligi boʻyicha yagona holat emas. Avvalroq, vagon eshiklarining ochiq holda harakatlanishi, toʻxtab qolishi va metro vagonida yongʻin ham kuzatilgandi. Shuningdek, avgust oyida aynan Yunusobod yoʻnalishining ikki bekati profilaktika uchun yopilgandi.
