Sergelidagi portlash oqibatida qancha zarar koʻrilgani ochiqlandi
Avvalroq, portlash sabab 4 kishi qamoqqa olingani maʼlum boʻlgandi.
28 sentabr kuni Toshkent shahar, Sergeli tumanida joylashgan “Interlogistics” MChJ hududidagi omborxonada sodir boʻlgan yongʻin va portlash zarari 14,5 mlrd soʻmni tashkil etmoqda. Bu haqda Hukumat komissiyasi maʼlumotida aytiladi.
Favqulodda vaziyat oqibatida umumiy jabrlanganlar soni 163 nafarni tashkil etgan boʻlib, ularning 150 nafari yengil va 13 nafari ogʻir tan jarohati olgan. Bir nafar voyaga yetmagan fuqaro olgan ogʻir tan jarohatlari natijasida vafot etgan.
Jarohat olganlarning 24 nafari shifoxonaga yotqizilib, ularga tegishli tibbiy va psixologik yordam koʻrsatilgan. Qolgan 138 nafari ambulator davolanishga yuborilgan. Hozirda jarohatlangan barcha fuqarolarning salomatligi tiklanib, uyiga ruhsat berilgan.
Aholining muammolarini tezkor bartaraf etish maqsadida “1205” qisqa raqamli “Call-center” tashkil etildi. Markazga 450 dan ortiq murojaat kelib tushgan va barchasi ijobiy hal qilingan.
400 ta ehtiyojmand oilalarga oziq-ovqat mahsulotlari yetkazildi hamda ularning 100 nafar voyaga yetmagan farzandlariga moddiy yordam koʻrsatildi, deyiladi xabarda.
Favqulodda vaziyat oqibatida 39 ta koʻp qavatli uylardagi 1370 ta xonadon hamda 246 ta yerli xonadonning fasad, oyna-rom, eshik va tom qismiga ziyon yetkazilgan.
Avvalroq, portlash sabab 4 kishi qamoqqa olingani maʼlum qilingandi. Toshkent shahar hokimligi esa 26 ta koʻp qavatli uydagi 592 ta xonadon hamda 8 ta xizmat koʻrsatish shoxobchasi, 1 ta maktab va 2 ta MTT binolarining fasad qismi hamda deraza-romlariga zarar yetganini ochiqlagandi.