Maktab rahbariyati 21 tup daraxtni kesib tashladi
Bu holat Namangan prokuraturasi va Ekologiya boshqarmasi oʻtkazgan tekshirishda aniqlangan.
Namangan viloyati Chust tumanidagi 42-maktab internat rahbariyati 2022-2023 yillar davomida 21 tup manzarali daraxtni qonunga zid ravishda kesib tashlab, oʻsimlik dunyosiga 529,5 mln. soʻm zarar yetkazgan.
Bu holat viloyat prokuraturasi hamda Ekologiya, atrof-muhitni muhofaza qilish va iqlim oʻzgarishi boshqarmasi oʻtkazgan tekshirishda aniqlangan.
Mazkur holat yuzasidan viloyat prokuraturasi tomonidan Jinoyat kodeksining 198-moddasi 2-qismi (Ekinzorlarni, oʻrmonlarni, daraxtlarni yoki boshqa oʻsimliklarni shikastlantirish yoxud nobud qilish) bilan jinoyat ishi qoʻzgʻatilgan.
Hozirda ichki ishlar organi tomonidan dastlabki tergov harakatlari oʻtkazilmoqda.