Shavkat Mirziyoyev Bishkekda Lukashenko bilan uchrashdi
Boʻlajak tadbirlar rejasi ham koʻrib chiqilgan.
Oʻzbekiston Respublikasi Prezidenti Shavkat Mirziyoyev 13 oktabr kuni Bishkek shahrida oʻtayotgan MDH sammiti doirasida Belarus Respublikasi Prezidenti Aleksandr Lukashenko bilan uchrashuv oʻtkazdi.
Ikki tomonlama munosabatlarning dolzarb masalalari muhokama qilindi.
Oʻzaro tovar ayirboshlash koʻrsatkichlari oʻsmoqda, iqtisodiyotning turli tarmoqlarida kooperatsiya loyihalarini amalga oshirish davom etmoqda.
Madaniyat, kinematografiya va sport sohasida qoʻshma tadbirlar muntazam oʻtkazib borilmoqda.
Davlat rahbarlari savdo-iqtisodiy va gumanitar hamkorlikni yanada kengaytirish boʻyicha oʻzaro muvofiqlashgan choralarni koʻrish, jumladan, Hukumatlararo komissiyaning navbatdagi yigʻilishi, Hududlar forumi hamda Oʻzbekiston va Belarus yetakchi oliy taʼlim muassasalari rektorlarining uchrashuvini tashkil etish muhimligini qayd etdilar, deyiladi rasmiy xabarda.
MDH va boshqa xalqaro tuzilmalar doirasidagi hamkorlik yuzasidan fikr almashildi.
Boʻlajak tadbirlar rejasi ham koʻrib chiqildi.