Qatar kompaniyasi Oʻzbekistonda 4 ta yirik loyihani moliyalashtirmoqda

Qatarning Nebras Power kompaniyasi Oʻzbekistonning 4 ta hududida yirik energetik loyihalarni amalga oshirmoqda.

Shavkat Mirziyoyev bugun, 1 oktabr kuni kompaniya boshqaruvi raisi Muhammad al-Hajriy bilan uchrashgan. Uchrashuvda energetika, muqobil energetikada yangi loyihalarni ilgari surish boʻyicha hamkorlik masalasi koʻrib chiqilgan.

Xususan:

• Sirdaryo viloyatida bugʻ-gaz texnologiyalari asosida quvvati 1,6 GVt boʻlgan zamonaviy elektr stansiyasi qurilishi boshlangan;
• Surxondaryo viloyatida issiqlik elektr stansiyasini barpo etish loyihasi yakunlanmoqda;
• Toshkent viloyatida 600 MVt quvvatli energiya saqlash tizimlari yaratiladi;
• Qoraqalpogʻistonda 1 GVt quvvatli shamol elektr stansiyasi ishga tushiriladi.

Muzokarada uzoq muddatli sheriklik dasturini qabul qilish, eng avvalo “yashil” energetikaga doir istiqbolli loyihalarni kiritish boʻyicha kelishuvga erishilgan.

Maʼlumot uchun, Nebras Power – Qatarning yetakchi energetika korporatsiyasi boʻlib, oʻndan ziyod mamlakatda yirik loyihalarni amalga oshirgan.