Shavkat Mirziyoyev amaliy tashrif bilan Germaniyaga boradi
Tashrif davomida qanday tadbirlar boʻlishi ham maʼlum qilindi.
Oʻzbekiston Respublikasi Prezidenti Shavkat Mirziyoyev Germaniya Federal kansleri Olaf Sholsning taklifiga binoan 28-30 sentabr kunlari amaliy tashrif bilan Berlin shahrida boʻladi.
Tashrif dasturiga muvofiq, Federal kansler Olaf Shols va Federal Prezident Frank-Valter Shtaynmayer bilan ikki tomonlama muzokaralar oʻtkazilishi, shuningdek, Markaziy Osiyo va Germaniya davlat rahbarlarining uchrashuvlari rejalashtirilgan.
Shavkat Mirziyoyev Germaniya iqtisodiyoti Sharqiy qoʻmitasi tomonidan tashkil etiladigan ishbilarmonlik tadbirlarida ham ishtirok etishi koʻzda tutilgan.
Kun tartibidan Oʻzbekiston Prezidentining joriy yil may oyidagi Germaniyaga rasmiy tashrifi davomida erishilgan kelishuvlarni amalga oshirish, Germaniyaning yetakchi kompaniya va banklari bilan investitsiyaviy, innovatsiyaviy va texnologik hamkorlikni kengaytirish masalalari oʻrin olgan.
