3 oy ichida 145 ta mahallaga ilk bor toza suv kirib borishi kerak
Prezident ichimlik suvi taʼminotiga bagʻishlangan tanqidiy yigʻilishda “Oʻzsuvtaʼminot”ga shu topshiriqni berdi.
“Oʻzsuvtaʼminot” aksiyadorlik jamiyatiga joriy yil yakunigacha 12 ming kilometr tarmoq hamda 1300 ta suv inshootini qurish va taʼmirlash vazifasi qoʻyildi. Buning hisobiga 145 ta mahalladagi 1 million 100 ming aholi ilk bor markazlashgan ichimlik suvidan bahramand boʻladi, 2 mingta mahalladagi taʼminot yaxshilanadi.
Shavkat Mirziyoyev 22 sentabr kuni aholini sifatli ichimlik suvi bilan taʼminlash masalalari boʻyicha tanqidiy yigʻilish oʻtkazdi.
Davlat rahbari viloyat hokimlariga xalq deputatlari bilan birga kelgusi yil uchun dastur ishlab chiqib, hukumat qaroriga kiritishni topshirdi. Bunda suv taʼminoti darajasi past 30 ta tumanga alohida eʼtibor qaratish kerak boʻladi.
Shuningdek, Shavkat Mirziyoyev Qoʻshrabot tumanida ichimlik suvi taʼminotini yaxshilash, Buxoro va Jizzax shaharlarida oqova suv, Guliston, Yangiyer va Shirin shaharlarida kanalizatsiya tizimlarini rekonstruksiya qilish kabi loyihalarning bajarilishini ham koʻrib chiqdi.
"Buxorodagi ishlar xarajati maqbullashtirilgani bu borada namuna. Xususan, Buxoro shahrida tozalash va oqova suv tizimini rekonstruksiya qilish boʻyicha 281 million dollarlik loyihaning 75 million dollari iqtisod qilingan. Bu mablagʻ evaziga yana 1150 kilometr suv va 117 kilometr oqova tarmoqlarini qurish mumkin", dedi prezident.
Soʻnggi olti yilda ichimlik suvi sohasiga davlat byudjetidan 14 trillion 500 milliard soʻm yoki oldingi davrga nisbatan 6 baravar koʻp mablagʻ ajratilgan. 31 ming kilometr ichimlik suvi va oqova tarmoqlari oʻtkazilgan, 1200 ta suv inshootida qurilish-taʼmirlash boʻlgan. Bu ishlar natijasida mingta mahalladagi 6,5 million aholi yashaydigan xonadonlarga ilk bor toza ichimlik suvi kirib borgan.
Lekin hali 30 ta tuman va 1400 ta mahallada ichimlik suvi taʼminotini yaxshilash talab etiladi. Ayrim nasoslar, soha korxonalariga tegishli maxsus texnikalar eskirgan.
