Buxoroda imtiyozli kreditni "yeb yuborgan" hokim yordamchisi qamoqqa olindi
Viloyat prokuraturasi hodisa tafsilotlarini ochiqladi.
Buxoroda 163 mln soʻm imtiyozli kreditni oʻzlashtirib yuborgan hokim yordamchisi qamoqqa olindi. Bu haqda Buxoro viloyati prokuraturasi xabar berdi.
Maʼlum boʻlishicha, Buxoro shahri “Abu Ali ibn Sino” MFY hokim yordamchisi prezidentining “Har bir oila-tadbirkor” dasturini amalga oshirish toʻgʻrisida”gi PQ-3777 sonli qarori bilan berilgan fuqarolarga imtiyozli kreditlar ajratishdagi maxsus vakolatdan mansab mavqeyini suiisteʼmol qilib, kredit mablagʻlarini oʻzlashtirgan.
Xususan, u “Abu Ali ibn Sino” MFY hududida yashamaydigan va faoliyat koʻrsatmaydigan M.H., J.A., N.Gʻ., M.A. va A.M. nomiga mototransport vositasi hamda ichimlik suvini qayta ishlash apparatini sotib olish uchun 33 mln soʻmdan, jami 163 mln soʻmlik imtiyozli kredit ajratib, ularni oʻzlashtirish yoʻli bilan talon-toroj qilgan.
Unga nisbatan jinoyat ishi qoʻzgʻatilib, “qamoqqa olish” tarzidagi ehtiyot chorasi qoʻllanilgan, deyiladi xabarda.