Shavkat Mirziyoyev Dushanbeda Emomali Rahmon bilan uchrashdi
Uchrashuvda strategik sheriklik va ittifoqchilik masalalari ham muhokama qilingan.
Oʻzbekiston Respublikasi Prezidenti Shavkat Mirziyoyevning Dushanbega tashrifi Tojikiston Respublikasi Prezidenti Emomali Rahmon bilan uchrashuvdan boshlandi. Bu haqda prezident matbuot xizmati xabar bermoqda.
Oʻzbekiston bilan Tojikiston oʻrtasidagi strategik sheriklik va ittifoqchilik munosabatlarini yanada mustahkamlashning dolzarb masalalari muhokama qilindi.
Oliy darajadagi kelishuvlar ijrosining amaliy jihatlariga, eng avvalo, iqtisodiyotning ustuvor tarmoqlarida kooperatsiya loyihalarini ilgari surish va madaniy-gumanitar almashinuv dasturini kengaytirishga alohida eʼtibor qaratildi.
Bu borada qoʻshma Hukumatlararo komissiya samarali faoliyat olib borayotgani mamnuniyat bilan qayd etildi.
Uchrashuvda davlat rahbarlari Markaziy Osiyo mamlakatlari yetakchilarining navbatdagi Maslahat uchrashuvi va Orolni qutqarish xalqaro jamgʻarmasi sammiti kun tartibiga kiritilgan masalalar yuzasidan fikr almashdilar, deyiladi xabarda.
Mintaqaviy hamkorlikning boshqa jihatlari ham koʻrib chiqildi.