Gepatit “S” bilan kasallangan bolalar toʻliq davlat hisobidan davolanadi
2023 yil 1 oktabrdan ogʻir hayotiy vaziyatga tushgan yoki tushish xavfi yuqori boʻlgan har bir oila boʻyicha alohida “ijtimoiy xizmat ishi”ni yuritish tartibi joriy etiladi.
![Gepatit “S” bilan kasallangan bolalar toʻliq davlat hisobidan davolanadi](https://cp.platina.uz/media/CACHE/images/gepatity-s-deti-1.19cf53f032c8.webp)
Oʻzbekistonda gepatit “S” bilan kasallangan bolalar toʻliq davlat byudjeti hisobidan davolanadi. Bu haqda “Oʻzbekiston – 2030” strategiyasi hamda uni 2023 yilda oʻzi vaqtida va sifatli amalga oshirish boʻyicha Prezident qarorida aytiladi.
Qarorga koʻra, 2024 yil 1 yanvardan:
- onkogematologik kasalliklarga chalingan bolalar uchun gemotopoetik suyak koʻmigi oʻzak hujayralari transplantatsiyasi amaliyoti joriy etiladi;
- virusli gepatitning “S” turi bilan kasallangan bemorlarni hamda gemotopoetik suyak koʻmigi oʻzak hujayralari transplantatsiyasi muolajasiga muhtoj onkologik kasalliklarga chalingan bolalarni toʻliq Davlat byudjeti mablagʻlari hisobidan davolash yoʻlga qoʻyiladi.
2023 yil 1 oktabrdan ogʻir hayotiy vaziyatga tushgan yoki tushish xavfi yuqori boʻlgan har bir oila boʻyicha alohida “ijtimoiy xizmat ishi”ni yuritish tartibi joriy etiladi.
2024 yil 1 yanvardan:
- Toshkent shahrining tibbiyot muassasalarida davlat tomonidan kafolatlangan bepul tibbiy xizmatlar hajmi va dori vositalari roʻyxatini amaliyotga kiritishni nazarda tutuvchi davlat tibbiy sugʻurtasi mexanizmlari bosqichma-bosqich joriy etiladi;
- nogironligi boʻlgan shaxslarni protez-ortopediya buyumlari, reabilitatsiya hamda dori vositalari bilan taʼminlash ishlari “vaucher” tizimi asosida tashkil etiladi;
- ogʻir ijtimoiy ahvolga tushib qolgan xotin-qizlarni qayta kasbga tayyorlash xarajatlarini davlat tomonidan qoplab berish tartibi joriy etiladi.
Qaror bilan “Oʻzbekiston – 2030” strategiyasining har bir insonga oʻz salohiyatini roʻyobga chiqarish uchun munosib sharoitlar yaratish yoʻnalishi boʻyicha 2023 yilga moʻljallangan amaliy tadbirlar rejasi tasdiqlandi.
Unda, jumladan, quyidagilar nazarda tutilgan:
- maktablarda 1-sinfdan kompyuter savodxonligi darslarini joriy etish;
- 5 ming nafargacha professor-oʻqituvchilarni tajriba almashish uchun, 200 nafargacha yosh olimlarni ilmiy daraja olish uchun tanlov asosida xorijiy ilmiy tashkilotlarga yuborish;
- Buxoro shahrida Jadidlar muzeyini tashkil qilish.
Avvalroq 2024 yil 1 yanvardan davlat maktabgacha taʼlim tashkilotlari tarbiyalanuvchilariga oqsil, vitamin va minerallar bilan boyitilgan sut, yod bilan toʻyintirilgan non mahsulotlari berilishi yoʻlga qoʻyilishi aytilgandi.