Bugungi kuchli shamollar,  chang-toʻzon va gʻubor yana qancha davom etadi?

Bugun poytaxt Toshkent shahri va Oʻzbekistonning qator hududlarida chang-toʻzonli ob-havo kuzatildi. “Oʻzgidromet” ushbu holatning qancha davom etishi boʻyicha maʼlumot berdi.

“2023 yil 10 sentabrda respublikaning shimoliy-gʻarbiy hududlariga, 11 sentabrda Oʻzbekistonning boshqa hududlariga Kavkaz xududidan salqin va nisbatan nam havo oqimlari kirib keldi. Gʻarbiy oqim fronti respublikaning koʻpchilik hududlarida baʼzi joylarda shamol tezligi 13-17 m/s gacha, janubda va choʻl hududlarda 20 m/s kuchayishiga olib keldi. Xorazm, Buxoro, Navoiy, Jizzax, Qashqadaryo, Surxondaryo viloyatlarida shamol chang-toʻzon bilan qayd etildi, koʻrinuvchanlik 500-2000 metrgacha yomonlashdi.

Kunning ikkinchi yarmida frontal bulutli chiziq Toshkentning gʻarbiy tumanlariga yaqinlashdi. Soat 15:05 dan 16:00 gacha Toshkentda shamol tezligi 10-12 m/s gacha kuchayishi kuzatildi. Shamol yerning qurigan yuzasidan chang zarralarini koʻtardi, bu esa havoning xiralashishiga va koʻrinuvchanlik 1400 metrgacha yomonlashishiga sabab boʻldi.

Toshkentda atmosfera havosidagi RM10 mayda zarrachalarining miqdori 1322 mkg/m3 ni tashkil etdi, bu ruxsat etilgan qiymatdan 2,4 marta koʻp; RM2,5 219 mkg/m3 mayda zarrachalarining miqdori BSST talablaridan 43 marta koʻp boʻldi. Toshkentda chang-gʻubor bugun, yaʼni 11 sentabr kuni va kechasi davomida saqlanib turadi” deya maʼlumot berdi “Oʻzgidromet”.

Eslatib oʻtamiz, Toshkent havo ifloslanishi boʻyicha jahon reytingida dastlab toʻrtinchi, soʻngra ikkinchi oʻringacha koʻtarildi.