Shavkat Mirziyoyev Sherali Joʻrayev vafoti sabab hamdardlik bildirdi
Eslatib oʻtamiz, sanʼatkor 4 sentabr kuni vafot etdi.
Prezident Shavkat Mirziyoyev va bir qator taniqli oʻzbek siyosatchilar Oʻzbekiston xalq artisti Sherali Joʻrayev vafoti munosabati bilan hamdardlik bildirdilar.
Sherali Joʻrayev 1947 yil 12 aprelda Andijon viloyatining Asaka shahrida tugʻildi.1971 yilda Toshkent teatr va rassomchilik sanʼati instituti (hozirgi Oʻzbekiston davlat sanʼat va madaniyat instituti)ni tamomlab, mehnat faoliyatini “Shodlik” ashula va raqs ansamblining xonandasi sifatida boshladi. Koʻp yillar Andijon viloyati filarmoniyasi, Oʻzbekiston davlat filarmoniyasi, “Oʻzbekkonsert” davlat muassasasi kabi ijodiy tashkilotlarda faoliyat koʻrsatgan.
"Sherali Joʻrayev oʻzining noyob isteʼdodi, betakror ovozi va yuksak ijro mahorati bilan yuzlab yorqin qoʻshiqlar yaratib, xalqimiz oʻrtasida munosib obroʻ-eʼtibor topdi. Mumtoz va zamonaviy adabiyotimizning koʻplab sheʼriy namunalarini kuyga solib, oʻzbek qoʻshiqchilik sanʼatining “oltin fondi”ni boyitishga beqiyos hissa qoʻshdi" deyiladi hamdardlik matnida.
Eslatib oʻtamiz, Sherali Joʻrayev kecha, 4 sentabr kuni vafot etdi.