Markaziy bank Oson toʻlov tizimidagi noqonuniy holatni izohladi
Avvalroq Markaziy bank ushbu toʻlov tashkilotiga sanksiya qoʻllagandi.
Markaziy bank ijtimoiy tarmoqda Oson toʻlov tizimi bilan bogʻliq holatni izohladi.
Jumladan, toʻlov tashkilotlari uchun transchegaraviy pul oʻtkazmalariga doir oʻrnatilayotgan cheklovlar yuzasidan tarqatilayotgan xabarlar boʻyicha Markaziy bank quyidagilarni bildirgan:
“BRIO GROUP” MChJ toʻlov tashkiloti tomonidan Ichki nazorat qoidalarining (roʻyxat raqami 3266, 2020 yil 30 iyun) 31¹-bandi talablari, yaʼni oluvchisi va (yoki) joʻnatuvchisi haqidagi talab qilingan maʼlumotlarni aks ettirmasdan va ushbu turdagi xalqaro pul oʻtkazmalarini aniqlash boʻyicha asosli va imkoni mavjud boʻlgan zaruriy choralar koʻrilmaganligi maʼlum qilinadi.
“Valyutani tartibga solish toʻgʻrisida”gi Qonunga muvofiq, rezident yuridik shaxslarga chet elda hisobvaraqlar ochish va undagi valyuta mablagʻlarini tasarruf etish Oʻzbekiston Respublikasi Prezidenti yoki Hukumatining qarorlari doirasida amalga oshirilishi mumkin.
Biroq, amaliyotda “BRIO GROUP” MChJ (OSON) toʻlov tashkiloti xorijiy bankda hisobvaraq ochib, mazkur bank hisobvaragʻi orqali yuqoridagi Qonun talablariga zid ravishda amaliyotlar oʻtkazgan" deyiladi bank izohida.
Avvalroq Markaziy bank ushbu toʻlov tizimiga sanksiya qoʻllagandi.
