Toshkent hokimi kredit va subsidiya uchun milliardlar ajratdi
Ayrim fuqarolarning dastlabki badal pullari qoplanadi va subsidiya ajratib beriladi.
Toshkent shahar hokimi ayrim fuqarolarning dastlabki badal pullarini qoplash va subsidiya ajratib berish uchun jami 74,2 mlrd. soʻm ajratdi.
Pullar prezidentning 2023 yil 13 apreldagi “2023-yilda bozor tamoyillariga asoslangan ipoteka kreditlari orqali aholini uy-joy bilan taʼminlash dasturini amalga oshirish chora-tadbirlari toʻgʻrisida” farmoniga asosan oʻtkazildi.
Xususan, Toshkent shahrida 1800 nafar daromadi yuqori boʻlmagan va uy-joy sharoitlarini yaxshilashga muhtoj boʻlgan fuqarolarga mahalliy byudjetning qoʻshimcha manbalari hisobidan ipoteka krediti boʻyicha dastlabki badal qismini qoplash uchun 57,6 mlrd. va ipoteka krediti boʻyicha foiz toʻlovlarining bir qismini qoplash uchun 12,7 mlrd. soʻm ajratildi.
Shuningdek, 120 nafar daromadi yuqori boʻlmagan va uy-joy sharoitlarini yaxshilashga muhtoj fuqarolarga ipoteka krediti boʻyicha dastlabki badal qismini qoplash uchun 3 mlrd. 840 mln. soʻm mablagʻlari sarflanadi.