Oʻzbekistondagi uy-joy obʼektlarining 70 foizi seysmik barqaror emas
Soʻnggi yillarda iqlim oʻzgarishi oqibatida respublika hududida tabiiy ofatlar soni sezilarli darajada oshdi.
Oʻzbekistonda obʼektlarning 70 foizi zilzilaga bardoshli emasligi aytildi.
Vazirlar Mahkamasining “Iqlim oʻzgarishi va tabiiy ofatlar xavfiga nisbatan milliy harakatlar rejasini ishlab chiqish hamda samarali amalga oshirishni tashkil etish toʻgʻrisida”gi qarori qabul qilindi.
Hujjatda qayd etilishicha, Oʻzbekiston aholisining qariyb 70 foizi seysmik faol zonalarda istiqomat qiladi. Koʻplab binolar, ayniqsa, yakka tartibdagi uylar qurilish norma va qoidalarini hisobga olmagan holda qurilganligi sababli uy-joy qurilish obʼektlarining 70 foizi seysmik barqaror emas.
Respublikada 12 ballik xalqaro MSK-64 shkalasi boʻyicha intensivligi 7 ball va undan yuqori boʻlgan zilzilalar sodir boʻlish xavfi mavjud. Kuchli zilzilalarda eng koʻp zarar koʻradigan uy-joy sektori, xizmat koʻrsatish, iqtisodiyot, sanoat va savdo sohalari boʻlib, ularning aksariyati shaharlar va yirik aholi punktlarida joylashgan.
Soʻnggi yillarda iqlim oʻzgarishi oqibatida respublika hududida tabiiy ofatlar soni sezilarli darajada oshdi. Tabiiy ofatlarning oʻrtacha soni 2001-2010 yillarda — 115 ta holat, 2011-2022 yillarda — 126 ta holatni tashkil etgan.
