Hindistonning yana bir dorisi xavfli deb topildi
Bu sirop bolalarda jiddiy shikastlanish yoki oʻlimga olib kelishi mumkin.
Jahon sogʻliqni saqlash tashkiloti Hindistonda ishlab chiqarilgan "Cold Out" yoʻtal va shamollashga qarshi sirop xavfi haqida ogohlantirdi. Bu haqda DW nashri xabar bermoqda.
Dushanba kuni Iroqda sotilayotgan Hindistonda ishlab chiqarilgan "Cold Out" yoʻtal siropi haqida global ogohlantirish eʼlon qilindi. Dori toksinlar bilan ifloslanganligi aniqlandi.
“Mahsulotning sifatsiz partiyasi xavfsiz emas va undan foydalanish, ayniqsa, bolalarda, jiddiy shikastlanish yoki oʻlimga olib kelishi mumkin”, — deyiladi ogohlantirishda.
Bu oxirgi 10 oy ichida Hindiston farmatsevtika ishlab chiqaruvchisiga qarshi beshinchi shunday ogohlantirishdir.
Eslatib oʻtamiz, 2022 yil dekabrida Gambiyada 66 bola Hindistonda ishlab chiqarilgan yoʻtal siropi qabul qilinishi ortidan vafot etgandi.
Afsuski, bunga oʻxshash voqealar Oʻzbekiston uchun ham begona emas. Oʻtgan yili oxirida yigirmadan ziyod bola “Ambronol” va “DOK-1 Maks” siroplari isteʼmolidan soʻng vafot etgandi. Soʻngra, ushbu mahsulotlarni ishlab chiqargan Marion Biotech kompaniyasi zaharli sanoat mahsulotidan foydalangani aniqlandi.
