Oʻzbekiston Pokistondagi ayanchli teraktga munosabat bildirdi
"Bu ogʻir damlarda birodar Pokiston bilan birgamiz" deyiladi munosabatda.
Oʻzbekiston tashqi ishlar vaziri Baxtiyor Saidov Pokistonda 44 kishi halok boʻlgan teraktga munosabat bildirdi.
"Pokistonning Bajaur hududidagi siyosiy qurultoyda sodir boʻlgan terrorchilik hujumi oqibatida koʻplab insonlar halok boʻlganidan chuqur qaygʻudamiz.
Qurbonlarning oila aʼzolari va yaqinlariga oʻz hamdardligimizni bildiramiz. Bu ogʻir damlarda birodar Pokiston bilan birgamiz" deyiladi munosabatda.
Eslatib oʻtamiz, 30 iyul kuni, Pokiston shimoli-gʻarbidagi Xayber-Paxtunxva viloyatida “Islom ulamolari assambleyasi” partiyasi qurultoyida terakt sodir etildi. Unda 44 kishi oʻldi, 100 dan oshiq kishi esa jabrlandi.
