Shavkat Mirziyoyev Saudiya Arabistoni valiahdi bilan uchrashdi
Valiahd Shavkat Mirziyoyevni boʻlib oʻtgan Prezident saylovidagi gʻalabasi bilan tabrikladi.
Oʻzbekiston Prezidenti Shavkat Mirziyoyev 19 iyul kuni Koʻrfaz arab davlatlari hamkorlik kengashi va Markaziy Osiyo mamlakatlari yetakchilarining birinchi sammiti doirasida Saudiya Arabistoni Podshohligi Valiahdi, Bosh vaziri Muhammad bin Salmon Ol Saud bilan uchrashuv oʻtkazdi.
Bu haqda prezident matbuot xizmati xabar bermoqda.
Valiahd Shavkat Mirziyoyevni boʻlib oʻtgan Prezident saylovidagi gʻalabasi bilan dildan qutlab, Oʻzbekistonning koʻp millatli xalqiga tinchlik-osoyishtalik, farovonlik va ravnaq tiladi.
Shavkat Mirziyoyev, oʻz navbatida, Saudiya Arabistoni rahbariyatiga Oʻzbekiston fuqarolari haj va umra amallarini ado etishlariga yaratilgan sharoitlar uchun samimiy minnatdorlik bildirdi.
Muzokaralarda Oʻzbekiston-Saudiya munosabatlarini yanada mustahkamlashning dolzarb masalalari koʻrib chiqildi.
Oʻtgan yilning avgust oyida oʻtgan ikki tomonlama sammit davomida qabul qilingan bitim va kelishuvlarni soʻzsiz amalga oshirish muhimligi taʼkidlandi.
Joriy yil boshidan tovar ayirboshlash hajmi 20 foizga, qoʻshma korxonalar soni ikki barobarga oshdi. Yetakchi “Acwa Power” kompaniyasi ishtirokida “yashil” energetikada muhim loyihalarni amalga oshirish boshlandi. “Yashil vodorod”, neft-kimyo, qishloq xoʻjaligi, farmatsevtika, tibbiyot, turizm va boshqa tarmoqlarda yirik investitsiya loyihalari ishlab chiqilmoqda.
Uchrashuvda xalqaro siyosat masalalari yuzasidan ham fikr almashildi, deyiladi xabarda.
Oʻzbekiston Respublikasi Prezidenti Shavkat Mirziyoyev Saudiya Arabistoniga amaliy tashrifini yakunladi va Toshkentga joʻnab ketdi.