Sayyorada rekord darajadagi issiq harorat kuzatildi
Meteorologlarning maʼlumotlariga koʻra, 3 iyul kuni Yerdagi oʻrtacha harorat 17 darajadan oshdi.
AQShning Ekologiyani prognoz qilish milliy markazi 3 iyul, dushanba kuni butun kuzatuvlar tarixida Yerda rekord darajadagi issiq oʻrtacha haroratni qayd etdi.
Bu haqda The Guardian nashri yozmoqda.
Meteorologlarning maʼlumotlariga koʻra, 3 iyul kuni Yerdagi oʻrtacha harorat 17 darajadan oshdi, bu kuzatuvlar boshlangan 1979 yildan beri kuzatilmagan. Gʻayritabiiy yuqori haroratning sababi El-Nino - Tinch okeanining ekvatorial qismidagi suv yuzasi haroratining oʻzgarishi deyiladi xabarda.
El-Nino - kuchli tabiiy hodisa, ekvatorial va Janubiy Tinch okeanidagi suv haroratining davriy ravishda oshishidir. Bu butun sayyoradagi iqlimga taʼsir qiladi. 2016 yilning avgustida qayd etilgan avvalgi rekord 16,92 daraja edi.
Jahon meteorologik tashkiloti (JMT) 2023 yil ikkinchi yarmida El-Nino hodisasi davom etishining ehtimolini 90 foizga baholamoqda. U kamida oʻrtacha kuchga ega boʻlishi kutilmoqda.
