Bolasi siropdan oʻlgan gambiyaliklar hind kompaniyasini sudga berdi

Gambiyada yoʻtal siropi ichish ortidan vafot etgan yigirma nafar bolaning qarindoshlari Hindistonning Maiden Pharmaceuticals kompaniyasi hamda mahalliy hokimiyatni sudga berdi. Bu haqda Reuters yozmoqda.

Hali ommaga eʼlon qilinmagan ariza oʻtgan yili Gambiyada oʻtkir buyrak yetishmovchiligidan vafot etgan yetmishga yaqin chaqaloq va bolalar ishi boʻyicha yangi jabha ochishi kutilmoqda.

Hujjat juma kuni Gambiya Oliy sudiga taqdim etildi. Unda oilalar har bir bola uchun taxminan 250 000 dollar tovon puli talab qilmoqda, bu 20 nafar bola uchun taxminan 5 million dollar mablagʻni tashkil etadi.

Oilalar, shuningdek, Gambiya Sogʻliqni saqlash vazirligi, Narkotik moddalarni nazorat qilish agentligi va mahalliy distribyutor Atlantic Pharmaceuticals kompaniyasini sudga berishmoqda.

Gambiya sud hokimiyati vakili daʼvo arizasi berilganini tasdiqladi. Daʼvoda koʻrsatilgan tomonlarning hech biri, shu jumladan Maiden kompaniyasi OAVning soʻrovlariga javob bermagan.

“Oilalarning boshidan kechirganlarini his qilish uchun farzandli boʻlish shart emas. Bu juda qoʻrqinchli”, deydi ish boʻyicha shugʻullanayotgan bosh advokat Lubna Faraj.

Eslatib oʻtamiz, 2022 yil dekabrida Gambiyada 66 bola yoʻtal siropi qabul qilinishi ortidan vafot etgandi.

Afsuski, bunga oʻxshash voqealar Oʻzbekiston uchun ham begona emas. Oʻtgan yili oxirida yigirmadan ziyod bola “Ambronol” va “DOK-1 Maks” siroplari isteʼmolidan soʻng vafot etgandi. Soʻngra, ushbu mahsulotlarni ishlab chiqargan Marion Biotech kompaniyasi zaharli sanoat mahsulotidan foydalangani aniqlandi.