AQShning eng katta dushmani qaysi davlat ekani aytildi
Siyosatchining soʻzlariga koʻra, Vashington tinchlikni har qanday yoʻl bilan, jumladan, butun dunyo boʻylab ittifoqchilari yordamida ham saqlashi kerak.
AQShning BMTdagi sobiq vakili, Respublikachilar partiyasidan prezidentlikka nomzod Nikki Xeylining soʻzlariga koʻra, Xitoy AQSh uchun eng katta xavf sanaladi.
Xitoy hukumati oʻz xalqini Tayvanga qarshi urushga tayyorlamoqda, deya Xeylining soʻzlarini keltiradi Fox News. Siyosatchining soʻzlariga koʻra, Vashington tinchlikni har qanday yoʻl bilan, jumladan, butun dunyo boʻylab ittifoqchilari yordamida ham saqlashi kerak.
“Xitoy shunchaki “raqobatchi” emas. Kommunistik Xitoy dushman. Bu Ikkinchi jahon urushidan beri biz duch kelgan eng xavfli tashqi tahdid.
Kommunistik partiya yiliga 600 milliard dollarlik innovatsiyalarimizni oʻgʻirlamoqda. U Amerikaning qudratiga putur yetkazish uchun Amerika tadbirkorligidan foydalanmoqda. Va prezident (AQSh Jo Bayden) bunga yoʻl qoʻyib bermoqda ”, dedi Xeyli.
Uning qoʻshimcha qilishicha, AQSh milliy xavfsizlikka jiddiy xavf tugʻdirishi sababli “Xitoy tahdidi”ga ham iqtisodiy, ham harbiy jihatdan javob berishi kerak.
"Xitoy bizning vatanimizga oʻzining shaxsiy oʻyin maydonchasi sifatida qaraydi", deya xulosa qildi AQSh prezidentligiga nomzod.
Eslatib oʻtamiz, AQSh-Xitoy munosabatlari hatto Qoʻshma Shtatlarning 45-prezidenti Donald Tramp davrida ham yomonlashdi, xususan, u Xitoy tovarlariga yangi bojlar joriy qilish orqali Xitoyga qarshi "iqtisodiy urush" boshladi. Bayden maʼmuriyati hokimiyatga kelganidan beri diplomatik munosabatlarni yaxshilashga urinishlariga qaramay, Vashingtonning Pekinga munosabati deyarli oʻzgarmadi.
