Jizzaxda 57 kishi ovqatdan zaharlangani tasdiqlandi
Bemorlarning 11 nafariga tibbiy yordam koʻrsatilib, uyiga javob berilgan.
Ijtimoiy tarmoqlarda tarqalgan Jizzaxda odamlar ovqatdan zaharlangani xabari tasdiqlandi. Viloyat prokuraturasi bu haqda maʼlumot berdi.
Aniqlanishicha, joriy yilning 25-26 iyun kunlari 57 nafar fuqarolar viloyat yuqumli kasalliklar shifoxonasiga ich ketish va tana harorati koʻtarilishi shikoyatlari bilan murojaat qilishgan.
Dastlabki laboratoriya tekshiruvi xulosasiga koʻra, fuqarolarga “Oʻtkir diareya” ovqatdan zaharlanish tashxisi qoʻyilib, tibbiy muolajalarni amalga oshirish uchun barchasi shifoxonaga yotqizilgan, deyiladi prokuratura xabarida.
Bemorlarning 11 nafariga tibbiy yordam koʻrsatilib, uyiga javob berilgan, 46 nafari qoniqarli ahvolda.
Jizzax shahar prokuraturasi tomonidan oʻtkazilayotgan tergovga qadar tekshiruv davomida bemorlar Jizzax shahridagi oshxonalarning birida ovqatlanganligi aniqlanib, hodisa joyidan olingan oziq-ovqat mahsulotlarining namunalari boʻyicha va barcha bemorlarga nisbatan tegishli ekspertizalar tayinlanib, soha mutaxassislari jalb etilgan.
Tergovga qadar tekshiruv harakatlari oʻtkazilmoqda.
