Nukusda yangi inklyuziv davlat xizmatlari markazi ochildi
Bu yerda eksterritoriallik tamoyili, yaʼni yashash va roʻyxatdan oʻtgan joyidan qatʼi nazar, davlat xizmatlaridan foydalanish tartibi joriy etilgan.
Qoraqalpogʻistonning Nukus tumanida davlat xizmatlari inklyuziv markazi ochildi. Bu yerda barcha hujjatlarni bitta joyda olish va yangilash mumkin.
Mazkur inklyuziv markaz Adliya vazirligi, Yevropa Ittifoqi va BMT Taraqqiyot Dasturining Oʻzbekistondagi vakolatxonasining “Oʻzbekistonning qishloq hududlarida davlat xizmatlarini taqdim etishni takomillashtirish va boshqaruv darajasini oshirish” qoʻshma loyihasi doirasida pilot (sinov) tariqasida tanlangan 7 ta markazdan biridir.
Bu yerda eksterritoriallik tamoyili, yaʼni yashash va roʻyxatdan oʻtgan joyidan qatʼi nazar, davlat xizmatlaridan foydalanish tartibi joriy etilgan. Nukus tumanidagi yangi DXM 280 ta davlat xizmatlarini koʻrsatadi va kuniga 300 nafarga yaqin aholiga xizmat koʻrsatish imkoniyatiga ega.
Markazda ayollar bepul yuridik yoki psixologik yordam olishlari, yangi koʻnikmalarni rivojlantirishlari va tadbirkorlik faoliyatini boshlashlari uchun maslahat yordami olishlari mumkin.