Qatar 12 mlrd dollar investitsiya kirityapti
Bu haqda Samarqand shahridagi Kongress markazida oʻtgan Shavkat Mirziyoyev va shayx Ol Soniy muzokarasida aytildi.
Qatarning yetakchi kompaniyalari energetika, gaz-kimyo sanoati, qishloq xoʻjaligi, infratuzilma, logistika, turizm va boshqa tarmoqlarda umumiy qiymati 12 milliard dollardan ziyod investitsiya kiritadi.
Bu haqda Samarqand shahridagi Kongress markazida oʻtgan Shavkat Mirziyoyev va shayx Ol Soniy muzokarasida aytilgan.
Uchrashuvda siyosiy muloqot va madaniy-gumanitar almashinuvni yanada rivojlantirish, savdo-iqtisodiy va investitsiyaviy hamkorlikni kengaytirish masalalari muhokama qilingan.
— Biz Qatarni nafaqat Yaqin Sharq mintaqasida, balki butun arab-musulmon olamida oʻzimizning istiqbolli hamkorimiz sifatida bilamiz. Siz bilan soʻnggi yillardagi muloqotlarimiz bois munosabatlarimizda katta siljish kuzatilmoqda, — degan Mirziyoyev.
Shuningdek, istiqbolli loyihalarni qoʻllab-quvvatlash maqsadida shu yil sentabr oyida Oʻzbekiston-Qatar investitsiya forumi oʻtkaziladi.
Muzokaralarda:
- Markaziy Osiyoni Koʻrfaz mamlakatlari bilan bogʻlaydigan eng qisqa, ishonchli va xavfsiz yoʻlaklarni shakllantirish;
- madaniyat, taʼlim va turizm sohalaridagi almashinuvlarni faollashtirishga qaratilgan saʼy-harakatlarni har tomonlama qoʻllab-quvvatlash;
- poytaxtlar oʻrtasida muntazam aviaqatnovlarni yoʻlga qoʻyish;
- Afgʻonistonga nisbatan pragmatik siyosat yuritish, mamlakat iqtisodiyotini qoʻllab-quvvatlash va afgʻon xalqiga insonparvarlik yordamini koʻrsatish;
- Transafgʻon temir yoʻlini barpo etish boʻyicha strategik loyihani amalga oshirish ham koʻrib chiqilgan.
Uchrashuv soʻngida shayx Tamim bin Hamad Ol Soniy Oʻzbekiston rahbarini Qatarga taklif qilgan.
Maʼlmuot uchun, bu yil Toshkent shahrida Qatar elchixonasi ochilgan. Qatar poytaxti Dohada esa Oʻzbekiston elchixonasi ochilishi kutilyapti.
