Tashkil etilganiga bir yil boʻlmagan vazirlik yana qayta tashkil qilinyapti
“Ekologiya va atrof-muhitni muhofaza qilish sohasini transformatsiya qilish va vakolatli davlat organi faoliyatini tashkil etish chora-tadbirlari toʻgʻrisida” prezident farmoni imzolandi.
2022 yil oxirida tuzilgan Tabiat resurslari vazirligi endi yana qaytadan takshil etilib, Ekologiya, atrof-muhitni muhofaza qilish va iqlim oʻzgarishi vazirligi deb qayta nomlanadi.
“Ekologiya va atrof-muhitni muhofaza qilish sohasini transformatsiya qilish va vakolatli davlat organi faoliyatini tashkil etish chora-tadbirlari toʻgʻrisida” prezident farmoni imzolangan.
Shuningdek, bosh prokuror oʻrinbosari lavozimi ham kiritilgan. U ekologiya, atrof-muhitni muhofaza qilish va oʻrmon xoʻjaligi sohasidagi qonunchilikka rioya etilishi va uning ijrosi ustidan nazoratga masʼul boʻladi.
2024 yildan, jumladan, quyidagilar uchun har yili 500 milliard soʻm ajratiladi:
- “yashil belbogʻ”, “yashil bogʻ” va “yashil jamoat park”lar hamda “yashil qoplamalar” – himoya oʻrmonzorlarini barpo etish va doimiy foydalanuvchiga topshirilgunga qadar saqlab turish;
- asosiy temir yoʻl va magistral avtoyoʻllar boʻyida daraxt koʻchatlarini ekish;
- har bir tuman va shaharda 5 gektardan kam boʻlmagan maydonlarda bogʻlar barpo etish.
Farmonga koʻra:
- 2023 yil 1 iyuldan “Jamoatchilik ekologiya nazoratchisi” tizimi joriy qilinadi.
- Vazirlikda alohida yuridik shaxs maqomiga ega boʻlmagan Davlat ekologik nazorat inspeksiyasi tashkil etiladi.
- 2023 yil 1 dekabrgacha tumanlarda (shaharlarda) atmosfera havosi ifloslanishi fon monitoringini amalga oshirish uchun avtomatlashgan kichik stansiyalar oʻrnatiladi.
- 2025 yil yakunigacha respublika hududi boʻyicha atmosfera havosining tabiiy ifloslanishi yuqori boʻlgan hududlarni prognozlash va aholini barvaqt ogohlantirish tizimi sinov tariqasida joriy etiladi.
- 2024 yil yakunigacha hududlarni ekologik baholash boʻyicha indikatorlar asosida eco-indicator.uz reytingi shakllantiriladi va har bir hududning ekologik pasporti eʼlon qilinadi.
- Milliy tabiiy meros obʼektlari roʻyxati joriy etiladi.
- 2023 yil yakunigacha har bir davlat tashkiloti va hokimlikning oʻz bogʻlari tashkil etiladi hamda 3 yil davomida parvarishlanadi.
- 2024 yil 1 yanvardan uy sharoitida yoki kasanachilik asosida daraxt va buta koʻchatlarini (nihol) yetishtirish faoliyati oʻzini oʻzi band qilgan shaxslar shugʻullanishi mumkin boʻlgan faoliyat (ishlar, xizmatlar) hisoblanadi.
