Shavkat Mirziyoyev va Sharl Mishel uchrashdi
Ular Afgʻoniston boʻyicha maslahatlashuvlarni va ushbu mamlakatga insonparvarlik yordamini davom ettirishga kelishib olishdi.
2 iyun kuni Oʻzbekiston prezidenti Shavkat Mirziyoyev Choʻlponota shahrida Markaziy Osiyo va Yevropa Ittifoqi yetakchilarining ikkinchi sammiti doirasida Yevropa kengashi prezidenti Sharl Mishel bilan uchrashdi.
Uchrashuvda Oʻzbekiston bilan Yevropa Ittifoqi oʻrtasidagi koʻp qirrali munosabatlarni yanada mustahkamlash va mintaqaviy formatda amaliy hamkorlikni rivojlantirishga oid masalalar koʻrib chiqildi.
Qayd etilishicha, Oʻzbekistonning YeI davlatlari bilan tovar ayirboshlash hajmi joriy yil boshidan buyon 70 foizga oshdi. Yevropaning yetakchi kompaniyalari ishtirokida Oʻzbekiston iqtisodiyotining yuqori texnologik tarmoqlaridagi investitsiya loyihalari portfeli 20 milliard yevrodan ortdi.
Oʻzbekiston va YeI yetakchilari:
- ikki tomonlama savdoni diversifikatsiya qilish va hajmini oshirish;
- GSP+ imtiyozli savdo tizimining amal qilish muddatini uzaytirish;
- samarali transport yoʻnalishlari, Transkaspiy tranzit yoʻlagini rivojlantirish;
- “yashil” energetika, innovatsiyalar va yuqori texnologiyalar, raqamlashtirish, ekologiya, taʼlim, turizm va boshqa sohalarda qoʻshma dasturlarni amalga oshirish masalalarini muhokama qilishdi.
Shuningdek, Afgʻoniston boʻyicha maslahatlashuvlarni va ushbu mamlakatga insonparvarlik yordamini davom ettirishga kelishib olishdi.
