Shavkat Mirziyoyev yana Qirgʻizistonga boradi
Sammitda ikki mintaqa oʻrtasidagi siyosiy, savdo-iqtisodiy va madaniy-gumanitar hamkorlik rejalari muhokama qilinishi rejalashtirilgan.
Shavkat Mirziyoyev bu yil hisobidan ikkinchi marta Qirgʻizistonga boradi va Choʻlpon-Ota shahrida oʻtadigan «Markaziy Osiyo - Yevropa ittifoqi» sammitida qatnashadi.
2-3 iyun kunlari boʻladigan sammitda Oʻzbekiston, Qirgʻiziston, Qozogʻiston va Tojikiston davlatlari rahbarlari, Turkmaniston bosh vaziri oʻrinbosari va Yevropa kengashi prezidenti Sharl Mishel qatnashadi.
Sammitda ikki mintaqa oʻrtasidagi siyosiy, savdo-iqtisodiy va madaniy-gumanitar hamkorlik rejalari muhokama qilinishi rejalashtirilgan.
Bu Markaziy Osiyo davlatlari rahbarlarining Sharl Mishel bilan ikkinchi uchrashuvidir. Birinchisi oʻtgan yilning kuzida Ostona shahrida boʻlgan edi.
Mirziyoyev Qirgʻizistonga soʻnggi marta shu yil boshida borgandi. Oʻshanda bir qator kelishuvlar, jumladan, chegaradan pasportsiz oʻtish haqida shartnomalar imzolangan edi.
