Toshkentdagi bogʻchada bolalarga igna tiqilgani oshkor boʻldi
Voqea poytaxtdagi 122-conli maktabgacha taʼlim tashkilotida sodir boʻlgan.
Toshkent shahar Yangihayot tumani 122-bogʻchada bolalarni uxlamagani uchun oyoqlariga igna tiqishayotgani aytilayotgan videoxabar ijtimoiy tarmoqlarga tarqaldi. Mazkur holat yuzasidan Toshkent shahar Maktabgacha va maktab taʼlimi boshqarmasi munosabat bildirdi.
Aniqlanishicha, pedagogika kolleji oʻquvchisi R.M. amaliyotini oʻtash uchun Yangihayot tumani “Oriyat” MFYda joylashgan 122-sonli davlat maktabgacha taʼlim tashkilotiga 11 may kunidan 4-sonli kichik guruhga qabul qilingan.
26 may kuni shu guruh tarbiyalanuvchilarining ikki-uch nafariga uxlamagani sababli igna tiqib olingani maʼlum boʻlgan. Hozirda talaba R.M. amaliyotdan chetlatilgan.
Mazkur holat yuzasidan Yangihayot tuman IIO FMB tomonidan surishtiruv ishlari olib borilmoqda.