Tehrondan uchgan samolyot favqulodda Toshkentga qoʻndi
Bunga samolyot bortida boʻlgan yoʻlovchining salomatligida muammo kuzatilgan.
Eronning Tehron shahridan Xitoyning Pekin shahriga uchayotgan samolyot Toshkentga favqulodda qoʻndi. Bu haqda “Uzbekistan Airports” Matbuot xizmati xabar berdi.
Maʼlum qilinishicha, Tehron-Pekin yoʻnalishida IRM079 reysini amalga oshirayotgan Mahan Air aviakompaniyasining samolyoti Toshkentga favqulodda qoʻndi. Samolyot kecha, 28 may kuni mahalliy vaqt bilan soat 23:20 da Toshkent aeroportiga kelib qoʻngan.
Bunga yurak xurujiga uchragan yoʻlovchi sabab boʻlgan. Yoʻlovchining sogʻligʻi yomonlashgani sababli ekipaj muqobil aerodromga qoʻnishga qaror qilgan.
Aeroportga qoʻngach, yoʻlovchi tez yordam mashinasida olib ketilgan va malakali tibbiy yordam koʻrsatish uchun tibbiy muassasaga yotqizilgan.
