Oʻzbekiston xalq artisti Qizlarxon Doʻstmuhammedova vafot etdi
Platina.uz jamoasi marhumaning yaqinlari va oila aʼzolariga hamdardlik bildiradi.
Oʻzbekiston xalq artisti, raqqosa Qizlarxon Doʻstmuhammedova vafot etdi. Bu haqda Madaniyat vazirligi xabar berdi.
Q.Doʻstmuhammedova 1946 yil, 25 oktabr sanasida Toshkent shahrida tavallud topgan. Dastlab 1965 yilda Toshkent davlat universitetini, 1977 yilda Toshkent teatr va rassomchilik sanʼati instituti (hozirgi Sanʼat va madaniyat instituti) tamomlagan.
Mehnat faoliyatini 1965 yilda M.Qori-Yoqubov nomidagi Oʻzbek Davlat filarmoniyasi balet solisti sifatida boshlagan va 1989 yilga qadar faoliyat olib borgan.
Q.Doʻstmuhamedova lirik raqqosa, raqslari nafis va jozibali harakatlarga boyligi bilan ajralib turadi. “Goʻzal”, “Tong malikasi”, “Goʻzal tong”, “Intizor”, “Buxoro yulduzi”, “Sevgi taronasi”, “Nozli” kabi zamonaviy, shuningdek, “Munojot”, “Tanavor”, “Moʻgʻulchai segoh”, “Qorakoʻzim”, “Guluzorim”, “Savti miskin” va bilan mumtoz raqslari mashhur.
“Shashmaqom” telefilmida qatnashgan (1972), “Tanavor” raqs ansambli (Sietl, AQSh)da oʻzbek raqslarini sahnalashtirgan. Doʻstmuhamedova ijodiga bagʻishlab “Nafosat guldastasi” nomli film ishlangan (1985). “El-yurt hurmati” ordeni bilan mukofotlangan (2000).