Toshkentda terrorchilik tashkilotining 8 nafar aʼzolari qoʻlga olindi
Ular Toshkent shahri hududida jamoaviy yigʻinlar oʻtkazib, kelgusida Suriya davlati hududida faoliyat yuritayotgan terrorchilik tashkilotlarining safiga borib qoʻshilishni rejalashtirgan.
Toshkent shahrida terrorchilik tashkilotining bir guruh yashirin aʼzolari qoʻlga olindi. Bu haqda poytaxt IIBB axborot xizmati xabar berdi.
Maʼlum qilinishicha, 20 may kuni huquqni muhofaza qiluvchi idoralar hamkorligida “Tavhid va jihod katibasi” nomli terrorchilik tashkilotining 8 nafar yashirin aʼzosi ushlandi. Ular Toshkent shahri hududida jamoaviy yigʻinlar oʻtkazib, kelgusida Suriya davlati hududida faoliyat yuritayotgan terrorchilik tashkilotlarining safiga borib qoʻshilishni rejalashtirgan.
Shuningdek, ular terrorchilik tashkiloti yetakchilari bilan internet tarmogʻi va turli ijtimoiy messenjerlar orqali aloqa oʻrnatib, ularning koʻrsatmalari asosida aholi orasida tashkilot gʻoyalarini targʻib qilish va tashkilot safini kengaytirish bilan shugʻullanib kelgan.
Hozirda mazkur holat yuzasidan Toshkent shahar IIBB huzuridagi Tergov boshqarmasi tomonidan Jinoyat kodeksining tegishli moddalari bilan jinoyat ishi qoʻzgʻatilib, gumon qilinuvchilarga nisbatan qamoq tarzidagi ehtiyot chorasi qoʻllangan. Tergov harakatlari davom etmoqda.
