Dunyoning eng baxtli va baxtsiz davlatlari reytingi eʼlon qilindi
Hanke's Annual Misery Index (HAMI) 2022 yil uchun dunyoning eng baxtli va baxtsiz mamlakatlari roʻyxatini eʼlon qildi. Oʻzbekistonning ham oʻrni maʼlum boʻldi.
Tadqiqotchilar reytingni ishsizlik darajasi, inflyatsiya va bank kreditlari stavkalari yigʻindisi, aholi jon boshiga real yalpi ichki mahsulotning yillik oʻsish foizi kabi koʻrsatkichlarga asoslab tuzgan.
Qashshoqlik indeksining bu yilgi roʻyxatidan 157 ta davlat oʻrin olgan. Unga koʻra, Zimbabve davlati aholisi dunyoda eng baxtsiz deb baholangan. Bunga sabab sifatida esa yuqori inflyatsiya darajasi keltirilgan. Mamlakatda 2020 yil 319 foizlik giperinflyatsiya kuzatilgan. Zimbabvening yalpi ichki mahsuloti hajmi 20,2 milliard dollarga teng boʻlgan. Bu boʻyicha jahonda 129 oʻrinda turadi.
Zimbabvedan keyingi oʻrinlarda Venesuela, Suriya, Livan, Sudan, Argentina, Yaman, Ukraina, Kuba va Turkiya kabi mamlakatlar eng baxtsiz davlatlarning oʻnligini tashkil etgan.
Oʻzbekiston esa roʻyxatning 46-pogʻonasida joylashib, mamlakatning baxtsizlik indeksi 44,4 ga baholangan. Davlatning baxtsizlik darajasiga eng koʻp taʼsir qiluvchi omil cifatida bank kredit stavkasining yuqoriligi koʻrsatilgan.
Markaziy Osiyoning yana bir davlati Qozogʻiston 47-oʻrindan joy egalladi. Mamlakatning asosiy muammosi inflyatsiyaning yuqori koʻrsatkichi ekani qayd etilgan. Qirgʻiziston roʻyxatning 57-oʻrnida qayd etilib, qoʻshni davlatning asosiy muammosi ham bank foiz stavkasining yuqoriligi maʼlum qilingan.