Qozogʻistondagi YTHda Oʻzbekiston fuqarolari halok boʻldi
Qozogʻistonning Doʻssor-Koʻlsari-Beyneu avtomobil yoʻlida Toyota Ipsum va "KamAZ" toʻqnashib ketishi oqibatida haydovchi hamda 3 nafar yoʻlovchi halok boʻlgan. Ularning barchasi Oʻzbekiston fuqarolari ekani aytilmoqda.
Bugun, 20 may kuni Qozogʻistonning Doʻssor-Koʻlsari-Beyneu avtomobil yoʻlining 133-kilometrida Toyota Ipsum avtomobili va "KamAZ" toʻqnashib ketgan.
Ushbu YTH hodisasi oqibatida Toyota avtomobili yonib ketgan, haydovchi va 3 nafar yoʻlovchi halok boʻlgan. Ikki yoʻlovchi turli tan jarohatlari bilan shifoxonaga yetkazilgan.
"Jabrlanganlarning shaxsini aniqlash boʻyicha ishlar olib borilmoqda. Hozircha halok boʻlganlar Oʻzbekiston fuqarolari ekani maʼlum. Yil boshidan buyon Toyota rusumli avtomashina haydovchisiga nisbatan 10 ta bayonnoma tuzilgan. Ular tezlikni oshirganlik uchun 8 ta, xavfsizlik kamarini taqmaganlik uchun ikkita bayonnoma belgilangan", — dedi Atirau viloyati Politsiya departamenti qoshidagi patrul politsiyasi rotasi komandiri Adilbek Shaxmetov.
