DXX "Hududgaz Toshkent" gaz taʼminoti mansabdor shaxslarini qoʻlga oldi
Ular jarima rasmiylashtirmaslik evaziga 8 ming AQSh dollarini til biriktirib olayotganda qoʻlga tushgan.
Davlat xavfsizlik xizmatining Toshkent viloyati boʻyicha boshqarmasi va Iqtisodiy jinoyatlarga qarshi kurashish departamentining hududiy boshqarmasi xodimlari hamkorligida tezkor tadbir oʻtkazildi.
Unda "Hududgaz Toshkent" gaz taʼminoti filialining "Oʻrtachirchiqtumangaz" gaz taʼminoti boʻlimi yetakchi muhandisi M.O. mahalliy MChJga qarashli avtomobillarga gaz quyish shoxobchasida belgilangan meʼyordan ortiq kompressor jihozlari oʻrnatilganligi uchun jarima rasmiylashtirmaslik evaziga 8 ming AQSh dollari olgan vaqtida ashyoviy dalillar bilan ushlandi.
Tezkor surishtiruv harakatlari davomida, u mazkur pul mablagʻini "Hududgaz Toshkent" gaz taminoti filialining yetakchi muhandisi B.M. koʻrsatmasiga asosan olganligi aniqlanib, ushbu shaxs ham ushlandi.
Hozirda holat yuzasidan mazkur mansabdor shaxslarga nisbatan Jinoyat Kodeksining 210-moddasi (pora olish) bilan jinoyat ishi qoʻzgʻatilib, qamoqqa olish tarzidagi ehtiyot chorasi qoʻllanilgan.